الأربعاء، 1 يوليو 2009

ردا على الاستفسارات

انا فى البوست دة هاحاول ارد على اغلب الاسئلة
وان شاء الله الرد يفيدكم
اولا اسماء بعض الاخشاب باللغة الانجليزية للى يحب يعمل عنها سيرش على النت
الخشب الزان beech wood
الخشب الارو oak wood
الخشب البلوط ash wood
الخشب العزيزى pine wood
الخشب الموسكى beech pine wood
الخشب الموجنة او الماهوجنى mahogany wood
خشب التك teak wood
خشب الورد rosewood
خشب البليسندر palisander wood
خشب الصندل sandalwood
خشب الكريز cherry wood
خشب الجوز walnut wood
خشب الابنوس ebony wood
خشب الحور او القيقب maple wood
خشب الابلاكاج plywood
دة تقريبا اللى انا فاكراه دلوقتى
اللى عايز يعرف اسم اى خشب تانى غير مذكور يبقى يقولى وانا لو اعرف ترجمتة اكيد هاقول عليه
==========
فى سؤال جالى عن المطابخ واى نوع خشب افضل
الموسكى ولا الكونتر
واحب اقول ان دة حاجة ودة حاجة تانية خالص ومافيش مقارنة بينهم لان الموسكى خشب طبيعى والكونتر خشب مصنع
يعنى ممكن نقارن بين الموسكى والزان او الموسكى والارو
وساعتها هايكون الارو ثم الزان ثم الموسكى
لكن الاخت سلمى اللى بتسأل احب اقولها انك ممكن تستخدمى الموسكى فى عضم المطبخ وتستخدمى الكونتر فى الضلف والاجناب والارفف
وان شاء الله المطبخ يطلع هايل
==========
ناس طلبوا منى الايميل
raniarachad@yahoo.com
==========
فى سؤال عن
ايهما افضل لدهان الابواب والشبابيك اللاكيه ولا الاستر خاصة وان الشبابيك معرضة للشمس؟
الافضل والاهم هو خدمة الشغل كويس جدا
يعنى ايه؟؟
يعنى مهم جدا اننا نصنع الابواب والشبابيك صح وخاصة طرق التعشيق بين الرؤوس والقوائم
ثم بعد كدة مهم جدا اننا نصنفر الخشب كويس جدا ثم يتم المعجنة كويس جدا جدا
وبعد ما نجهز الخشب كويس
اذا تم دهانه استر هايعيش اكبر وقت ممكن واذا تم دهانه لاكيه هايعيش برضه
بس انا افضل الاستر لان السيلر المشتخدم فى عزل الخشب عن الهوا وقفل مسامه مصنوع من مواد اصلها طبيعى او مخلقة زى الطبيعى والخشب بيقبلها ويتفاعل معاها
دة غير ان الاستر بيخلى الخشب على لونه وبيبان تجزيعاته وجماله الربانى
وبالنسبة للشبابيك المعرضه للشمس لازم تتعزل اولا وتتعزل كويس جدا وبعد كدة سواء لاكيه او استر مش هايفرق
=============
اتمنى اكون افدتكم
سلام عليكم

هناك 40 تعليقًا:

الفراغ يقول...

سلام عليكم
وصباح الخير
نشكركم مجموعة المهندسين(اسرة النجارين)

ياريت بقا تقولنا فعلا على نجارين ممتازيننقدر نتعامل معاهم واحنا واثقين فى شغلهم
ولا دا يبقى صعب عليكم
انا قلت اكيد بما انكم مهندسين ما شاء الله اكيد هاتتعاملوا مع ناس محترمه
لان من وجهة نظرى مهما عرفنا عن الخشب كل حاجه
اكيد النجار الوحش ممكن انه يضحك علينا
مش كدا ولا ايه

غير معرف يقول...

كل رمضان و الاسرة بخير
تحياتى

coco2005 يقول...

بارك الله فيكما وافاض عليكم بالعيال
الجمال

اما بعد
سؤالى عن احسن طريقة لدهان باب الحمام
حيث انه معرض للماء والرطوبه والطريقة بالتفصيل من فضلكم
لانى ناوى اعملها بنفسى
مع ملاحظة انه الباب قديم لكنه ليس متهالك ماس نفسه يعنى
ولكم جزيل الشكر

M.Fawaz Kabani يقول...

هل من الممكن الاجابة على هذين السؤالين :
1- ماهو خشب ال ( Birch ) وما هو تصنيفه مع خشب ال ( Beech ) أو ال ( African Mahogny ) وأي من الأنواع الثلاث أقوىز

2- ما هو أفضل أنواع الخشب لعمل أبواب خشب خارجية للمنازل التجارية .

وشكرا ً

باب النجار يقول...

الفراغ

وعليكم السلام
بالنسبة للنجارين
احنا عايشين خارج مصر وبالتالى ما عنديش خلفية عن نجار كويس ممكن تتعاملى معاه
وبصراحة تجاربنا مع النجارين فى مصر كانت سيئة جدا
ما صادفناش واحد فيهم راجل يعتمد عليه فى الشغل والمواعيد
يا إما واحد مواعيده وحشة جدا وشغله رائع
يا إما واحد مواعيده زفت وشغله زفتين

=================

Sonnet

كل سنة وانتى طيبة

=============

coco2005

بالنسبة لباب الحمام ما انصحكش تعمله بنفسك
ادى العيش لخبازه
خاصة انه باب قديم ومحتاج تهجيز كويس قبل الدهان
طبعا يفضل انك تزيل الدهان تماما
لحد ما توصل للخشب
وبعدين لاز مالباب يتم دهانه بعازل للماء
والمواد دى هتلاقيها متوفرة جدا فى شركة كيماويات البناء الحديث
هم هناك ها يدلوك على المادة المناسبة للى ممكن تعزل بيها الخشب

============

M.FAWAZ KABANI

بالنسبة للسؤال الاول
انا شخصيا مش عارفة ايه هو خشب ال بيرتش birch
لكن بالنسبة للخشب الاقوى
طبعا الزنا هو الاقوى اللى هو خشب ال beech

بالنسبة لأفضل انواع الخشب لعمل ابواب خارجية للمنازل
هو الخشب العزيزى اللى هو pinewood

غير معرف يقول...

بجد باشكركم جدا

كنت بادور على معلومة وعثرت على المدونة بالصدفه ...بجد محتاجه تتنشر اكتر

تعرفوا كنت بادور على معلومة عن قشرة اسمها غريب جدا عمرى ما سمعت عنه ..

قلت يمكن اسم تجارى او خاص بالصنايعية

لانى برضه عندى فكره مش بطالة ...عن الاخشاب انا سيدة عمرى 50 سنة مش بنت صغيرة يعنى ....

يا ريت الاقى رد على استفسارى ده

صنايعى بيقول القشرة اسمها:

قشرة بوبنجا ..وفى خشب من جدر البوبنجا ...!!!

اطمع انى اعرف ايه البونبجا ده؟؟؟

وايه تصنيفه لانه غالى جدا ...

وكمان عايزه اسال عن الماركتريه وانواع القشرة المتعدده فى الفن الرائع ده ...

انا شخصيا عندى سفرة كلها ماركتريه اصلى مش ملون ومغشوش زى اليومين دول ..


بصراحة اعرف ان افضل موبليا فى مصر فى اسكندرية مش دمياط ..رحت دمياط وللاسف الشغل هناك سيىء جدا وخاصة الفينشنج وعمليات التبريش ...

لا يمكن مثلا تلاقى ترابيزة سفرة من غير تعريجات ...

يا ريت تردوا على اسفاسراتى اكون شاكرة لكم

وكفاية انكوا اتحتوا الفرصة لنا نسال ناس متخصصه زيكوا


تحياتى واحترامى لعملكم الطيب ومساعدة الناس

كلمات من نور يقول...

باب النجار

تسلم الأيادي

على فكرة أنا زوجي غاوي خشب وقشرة واتعلمت على إيده كتير ...وكان عندنا ورشة وعملنا سفرتين بقشرة .أنا اخترت نوع وهو اختار نوع وطلعت بتاعتي الأحلى وصادرتها طبعا عالبيت .بس زي ما انتي بتقولي النجارين وحشين لعبوا بينا لما قالوا يا بس وبعدين جيراننا الطيبين بلغوا عننا علشان ورشة في اسكندرية في مكان ممنوع فيه الورش رغم اننا كنا لا بنستعمل دهانات ولا استر ولا اي ريحه تضايقهم .زبس انتي عارفه بقى بعض الجيران تعزلي بسببهم والحمدلله عزلت (:

تسلم إيديكي يارب

سبهللة يقول...

الى الاستاذة الغير معرفة

بالنسبة لخشب البوبنجا
هو اسمه كدة
ودى ترجمه إسمه باللغة الانجليزية
bubinga wood
ممكن عملى عنه سيرش على النت وتشوفى شكله
وبالنسبة للقشرة بتاعته فدة ترجمتها
bubinga veneer

انا معرفش هو ليه غالى
انا برة البلد بقالى فترة كبيرة اوى
وما عنديش اى خلفية عن اسعار الاخشاب

بالنسبة للماركيترى
انا اعتقد ان اى قشرة تنفع فيه لان المهم فيه هو الصنعة
وطبعا هو دلوقتى انحسر جدا دلوقتى لان محتاج صبر ومحتاج صنايعى ممتاز وطبعا الحاجات دى قلت جدا دلوقتى

بالنسبة لدمياط واسكندرية
فى رأئى المتواضع
ان الفرق والفيصل فى موضوع النجارين دة مش المكان
فى الزمن دة لو الواحد فاهم عمره ما هايضحك عليه ابدا حتى لو نزل جاب شغله كله من المناصرة او دمياط
لان فيه فى دمياط شكرات ومعارض كبيرة جدا ومصانع ممتازة وحتى فيه بعض الروش هايلة جدا
انا مااعرفش اى حاجة عن ورش اسكندرية
وزى ما قلت لحضرتك ان الفيصل فى الموضوع دة هو الزبون
لو بيفهم فى الخشب والتشطيب وعنده من الوعى اللى يخليه يتناقش مع النجار ويفهمه انه فاهم عمره ما ها يضحك علهي ابدا

Ahmed يقول...

ممكن ايميلك ..
انا ايميلى : ahmed.abdelhammid@link.net

ibrahim يقول...

سلام عليكم
عندى استفسار
ايه الفرق بين الموسكى الروسى و الفنلندى و البلدى
و ازاى نفرق بينهم و بين البياض مثلا
و ايهم أفضل لعمل حلوق الباب

blackguitar يقول...

diaa
السلام عليكم
عايز اعرف انواع خشب الموجنه وخشب القيقب وخشب الورد بألوانهم
الأنواع اللى موجوده فى مصر وخصوصا منطقة الدلتا

blackguitar يقول...

diaa
السلام عليكم
عايز اعرف انواع خشب الموجنه وخشب القيقب وخشب الورد بألوانهم
الأنواع اللى موجوده فى مصر وخصوصا منطقة الدلتا

غير معرف يقول...

السلام عليكم
انا محتاجه مشورتك بخصوص الخشب انا كنت هشتري غرف نوم من الصين من معرض في الهرم ولكن مجابش حاجه بيقول حصله مشاكل في الاستيراد وقالي هعملها هنا في مصر وفعلا رحت وشوفت الخشب في ورشف في المعتمدية فو بولاق الاول قالو ان القوايم هتبقي زان بس لقيتها كونتر وش الدولاب كونتر اسبانى والباقي كونتر عادي والسرير كله كونتر والمرتبه هتبقي على لوح كونتر كبير مش موله - اعرف منين انه خشب كويس وهل اخليه يعملي فخاد السرير زان احمر ولا الكونتر يتحمل ؟ هو بيقول ان الفخاد الكونتر هيدعمها يعنى دوبل مش لوح فردي وسعر الاوضه 7000 جنية واحده دولاب وسرير 150 سم والتانية 2 سرير 120سم و2 دولاب 150سم
وفي ركنه حرف ال بيقول زان ابيض وبسعر 6000 جنية بس انا طلبت يغير القاعده ويعملها زان احمر وهو موافق بنفس السعر بس انا مش مقتنعه وقلقانه ليضحك عليا اعمل ايه عشان اتاكد ان الخشب كويس وكمان السراير الصغيره ضهرها هيتحشي هي شفتها قبل الحشو خفيفه اوي من الكونتر ولكن بيقول بعد الحشو هتبقي تقيله ومش هقدر اشيلها حتى
اشكرك جدا على المشورة ويا ريت حتى لو تعرفي نجار قريب من الهرم تدينى تليفونه ويروح معايا قبل الدهان عشان اطمن
شكرا ليكي
نجلاء

غير معرف يقول...

لو سمحتوا انا عاوزه اعمل مطبخ يبقى من بره الاكريليك او ال pvc بس بيقلوا الدرفه من جوه هتبقى كونتر او mdf او بلاى وود انا لوقتى اعرف انهى نوع احسن منين؟؟ ده بالنسبه للدرفه من جوه لو سمحتوا لو حد يعرف يقولى

بيرو يقول...

عندي سفره قشره ارو عايزه ادهنها دوكو كيف افعل ذبنفسي

ام سنا يقول...

عملت مطبخ محتارة ادهنه استر ولا لاكية مغسول مش عارفة ايهما افضل

Aya adel Watany يقول...

انا بعمل غرفه والنجار بيقولي كونتر طبيعي والقوائم زان ده كويس ولالا

Unknown يقول...

انا قرأت المقالات اللي كاتبنها عن انواع الاخشاب الطبيعية و بجد مجهود رائع وانا تستفدت جدا منه. بس مش لافيه المقالات عن الخشب المصنع او ما يسمي بالمسطحات. يا ريت تكونوا عملتوها او تكملوا المقالات ديه لانها مفيدة جدا

Man bbc يقول...

في نجارين محترامين ويخافه ربنا
وشغلهم الله وأكبر عليهم وده عن تجربه شخصية شهاده لله

Man bbc يقول...

أفضل أنواع
العزيزي
او الارو
والعزيزي افضل لانه قابل للرطوبه صلب متين
له شكل وطابع خاص جوده عاليه

Man bbc يقول...

الفرق شاسع
الموسكي الروسي افضل وبعده الفنلندي
البياض رديء ومينفعش أصلا
ده بيتعمل منه شغل سوقي اقل سعر
لانه بيلف ومده صلحيته بتنتهي بسرعه
شغل الحلوق الافضل الروسي
لشده المتانه وجوده عاليه
وده عن خبره
أنا نجار

Man bbc يقول...

ست الكل اياك توافقي علي الكلام ده
لان شغل الموبليا الصح كله يبقي كبس
مش كنتر الكنتر بيلف وضعيف ومتصدقيش الكلام ده ده شغل نصب اي دولاب لازم شغل كبس ولازم يتعمل عمدان زان والسرير لازم يتكبس مش كنتر الكنتر ده شغل سوقي
كلامي عن خبره
انا نجار
تحياتي لحضرتك

Man bbc يقول...

استر افضل يافندم
لانه بيستحمل اي حاجه وقابل للتلميع في وقت

Man bbc يقول...

نصيحه بلاشششش
مهما كان جوده الكونتر بعد فتره قصيره عيوبه هتظر عندك الافضل شغل الكبس وده النجار الصح ال بيعمل ده
كلامي عن خبره
انا نجار
وتحياتي لحضرتك

Man bbc يقول...

ممكن أشارك مع حضرتكم
أنا نجار خبره 30سنه وممكن أفيد حضرتك ولو بشيء بسيط
ولكم جزيل الشكر
وجزاكم الله خير
تحياتي
ابو منار

Unknown يقول...
أزال المؤلف هذا التعليق.
Unknown يقول...

هو الخشب لو اكريليك مع برادة حديد يبقى متين ويستحمل وميجبش حشرات؟

mohamed يقول...




شركة جبس بورد بالرياض
سحر اللمسات افضل شركة جبس بورد بالرياض وتعمل في مجال الديكورات الجبسيه في الرياض ولديها افضل
وتعمل جميع أنواع جبس بورد الرياض ولديه فروف في أفضلشركة تنسيق حدائق بالرياض ومن أفضل شركات
واحدة من الشركات الرائدة في مجال تصميبم الديكــــــــــــور الداخلي في مدينة الرياض, شركة ديكور بالرياض متخصصة في تقديم أضخم خطط المشاريع وخدمات شركة مباني طينيه ونجديه وتراثيه بالرياض تك
للاتصال0500958844 0500958844
شركة كلادنج بالرياض




غير معرف يقول...

أيهما أفضل فى الابواب الداخلية الموسكي ولا الكونتر

Unknown يقول...

ممكن مقاله عن الخشب المسلح
زي مثلا شرح لخشب اللتزانه ؟ والعروق ؟
انواع الخشب المستخدم فيهوم وكدة

Unknown يقول...

دهان النجارة لاكية ام استر .. ايهما افضل شكليآ وعمليآ

Unknown يقول...

لو سمحت انا عامله مطبخ بيتش باين الدرف والجسم كونتر كان نفسي اعمله ابيض من فوق وبنى من تحت بس قالى أن الابيض صعب لان مفيش استر ابيض فهل ينفع ادهن تحت استر وفوق حاجه تانيه وايه الماده اللى ادهنها ابيض وتعيش معايا

Unknown يقول...

لو سمحت انا بعمل غرفه نوم وكنت عايزه لونها يكون غامق فاقترح النجار ان نعمل قشرتها صندل بيقول ان لونه بيكون حلو فالغامق احسن من القشرة الأرو ما مدي صحه الكلام ده وهل القشرة الارو افضل أنواع القشرة وأغلاها وايه أنواع القشرة التانيه اللي ممكن تكون حلوه فالشكل والجوده

Unknown يقول...

معلش حتي لو ضلف المطبخ كونتر يعني ينفع البوليستر ع الضلف الكونترا

Unknown يقول...

من فضلك عاوزة اعرف دهان باب الشقه اللاكية المغسول افضل ولا الدكو لان النجار قالى اللاكية المغسول بيصفر بعد فترة والافضل الدوكو

Unknown يقول...

هل يمكن تحويل الاستر الي لاكيه ؟؟

Mahmoud Elkadey يقول...

لو سمحت عاوز اعرف انواع الكونتر القشره ارو
اسماء الشركات وترتيبها من الافضل والاسعار حتى لو متاح من الاغلى للارخص

saffa4554@gmail.com يقول...

لو سمحت انا عايزه ادهن سفرة لونها ابيض ادهنها اسود ايه الافضل اللاكية ولا الدوكو

غير معرف يقول...

انا هعمل سفرة وهيبقي لونها اسود وفيها ابيض قليل ايه راي حضرتك ادهن لاكيه ولا دوكو افضل

Unknown يقول...

السلام عليكم بسأل بالنسبه لدهان دواخل الدولاب يكون قشره. ولا دوكو ايهما افضل مع العلم أن الدولاب باكيه