الأربعاء، 1 يوليو، 2009

ردا على الاستفسارات

انا فى البوست دة هاحاول ارد على اغلب الاسئلة
وان شاء الله الرد يفيدكم
اولا اسماء بعض الاخشاب باللغة الانجليزية للى يحب يعمل عنها سيرش على النت
الخشب الزان beech wood
الخشب الارو oak wood
الخشب البلوط ash wood
الخشب العزيزى pine wood
الخشب الموسكى beech pine wood
الخشب الموجنة او الماهوجنى mahogany wood
خشب التك teak wood
خشب الورد rosewood
خشب البليسندر palisander wood
خشب الصندل sandalwood
خشب الكريز cherry wood
خشب الجوز walnut wood
خشب الابنوس ebony wood
خشب الحور او القيقب maple wood
خشب الابلاكاج plywood
دة تقريبا اللى انا فاكراه دلوقتى
اللى عايز يعرف اسم اى خشب تانى غير مذكور يبقى يقولى وانا لو اعرف ترجمتة اكيد هاقول عليه
==========
فى سؤال جالى عن المطابخ واى نوع خشب افضل
الموسكى ولا الكونتر
واحب اقول ان دة حاجة ودة حاجة تانية خالص ومافيش مقارنة بينهم لان الموسكى خشب طبيعى والكونتر خشب مصنع
يعنى ممكن نقارن بين الموسكى والزان او الموسكى والارو
وساعتها هايكون الارو ثم الزان ثم الموسكى
لكن الاخت سلمى اللى بتسأل احب اقولها انك ممكن تستخدمى الموسكى فى عضم المطبخ وتستخدمى الكونتر فى الضلف والاجناب والارفف
وان شاء الله المطبخ يطلع هايل
==========
ناس طلبوا منى الايميل
raniarachad@yahoo.com
==========
فى سؤال عن
ايهما افضل لدهان الابواب والشبابيك اللاكيه ولا الاستر خاصة وان الشبابيك معرضة للشمس؟
الافضل والاهم هو خدمة الشغل كويس جدا
يعنى ايه؟؟
يعنى مهم جدا اننا نصنع الابواب والشبابيك صح وخاصة طرق التعشيق بين الرؤوس والقوائم
ثم بعد كدة مهم جدا اننا نصنفر الخشب كويس جدا ثم يتم المعجنة كويس جدا جدا
وبعد ما نجهز الخشب كويس
اذا تم دهانه استر هايعيش اكبر وقت ممكن واذا تم دهانه لاكيه هايعيش برضه
بس انا افضل الاستر لان السيلر المشتخدم فى عزل الخشب عن الهوا وقفل مسامه مصنوع من مواد اصلها طبيعى او مخلقة زى الطبيعى والخشب بيقبلها ويتفاعل معاها
دة غير ان الاستر بيخلى الخشب على لونه وبيبان تجزيعاته وجماله الربانى
وبالنسبة للشبابيك المعرضه للشمس لازم تتعزل اولا وتتعزل كويس جدا وبعد كدة سواء لاكيه او استر مش هايفرق
=============
اتمنى اكون افدتكم
سلام عليكم

السبت، 9 مايو، 2009

لأى استفسار

لكل الناس اللى بتسأل عن الخشب
للأسف انا معنديش وقت انى ادخل المدونة ولا انى اجاوب على الاستفسارات بسبب عدم وجود جهاز الكمبيوتر امامى فى الفترة السابقة والقادمة ولأجل غير مسمى بسبب تغيير محل اقامتى وبالتالى النت غير متوفر حاليا
دة رقم موبيلى لاى حد محتاج اى مساعدة فى اختيارت انواع الخشب اوالدهانات او الأثاث
0186445455
مهندسة رانيا البدرى

الأحد، 15 يونيو، 2008

الجزء الاخير من انواع الخشب الطبيعى

اتكلمنا فى البوستين اللى فاتوا عن سته انواع من الخشب الطبيعى الشائع استخدامها فى مصر
المرة دى هانتكلم عن اخر نوعين شائع استخدامهم فى مصر وهما
خشب التك وخشب الجوز التركى
اولا خشب التك
هو خشب شديد الصلابة قاتم الالياف يقاوم الرطوبة وبالتالى يستعمل فى صناعة القوارب ومناضد المعامل وأثاث الحدائق
ودى صوره

ودى صورة لأثاث مصنوع من خشب التك
خشب الجوز التركى
يعتبر خشب الجوز التركى من اثقل انواع الاخشاب حيث انه هو الخشب الوحيد اللى بيغطس فى الماء ولا يطفو عليها كبقية الاخشاب الال انه من اقوى انواع الاخشاب ومن اغلاها وهو مقاوم جيد للعوامل الجوية
والجوز التركى استخدامه فى مصر هو استخدام لقشرته فقط بسبب غلو سعره
ودى صورته

خشب الابنوس

أثقل الاخشاب وأصلبها صعب التشغيل ألوانة مختلفة من حيث الموطن فمنة الابيض المائل للأصفر والاحمر والبنى والاخضر والاسود الداكن ويستعمل فى أشغال القشرة وهو أغلى الانواع وأثمنة المعروفة وهو نادر الوجود

خشب الورد

وهو من الانواع الغالية جدا وطبعا استخداماته فى الاثاث قليلة جدا لكن ممكن يستخدم فى التحف الخشبية

خشب البليسندر

قليلا ما تستخدم القشرة البليسندروتسمى القشرة البليسندر فى لغة الصنعة قشرة زفرة وذلك بسبب اعتلائها مواد زيتية طبيعية تؤثر بالسلب على الدهانات

ومن باب العلم بالشىء ممكن نتكلم عن بعض انواع الاخشاب محلية الصنع يعنى اللى شجرها بينمو فى مصر

اولا خشب السنط
وهو خشب متين صلب يميل للأحمرار قريب من الزان وعندما يتعرض للجو يتخللة عروق غامقة اللون ويتغير لون ويمكن هو دة اللى بيفرقه عن الزان ويستخدم فى صناعة الالات الزراعية والمراكب والعربات ودرافيل عصارات القصب وفى أعمال البناء وقد يغش بعض التجار ويصنعوا منه الاثاث المنزلى على ويبيعوه على انه خشب زان

ثانيا خشب الجميز
خشب خفيف الوزن خشن الالياف يميل لونة الى الاحمرار الباهت مقارب للجوز التركى أستعمل قديما فى صناعة الابواب وبعض الاثاث والادوات الزراعية والالات الموسيقية وهو يتحمل الرطوبة لذلك يصنع منة المراكب والسواقى

ثالثا خشب التوت
لونة مائل للاصفرار يتخللة بعض الحلقات الباهتة اللون وهو صلب وله لمعان ويصلح لصناعة الاثاث والالات الزراعية والسفن وخلافة

رابعا خشب النبق
خشب جيد يصلح لصناعة الاثاث والالات الزراعية وفى نجارة العمارة حيث يستعاض بة عن الزان وهو يضارع خشب الماهوجنى

خامسا خشب الجازورينا
لونة بنى مائل للأحمرار قريب من الماهوجنى يستعمل فى صناعة الصوارى والمراكب الشراعية وأعمدة البرق وفى صناعة الابلكاش والكراسى الخرازينية والارضيات الباركية

سادسا خشب الكافور
خشب جيد سهل التشغيل متراكم الالياف يستعمل فى صناعة الاثاث حيث يشق الى ألواح وتؤخذ منة القشرة ويعمل منة الارضيات الباركية وهو يستخدم كبديل للماهوجنى

سابعا خشب اللبخ
خشب صلب لونة أبيض مائل للأصفرار يستخدم فى عمل السواق وهياكل المراكب الشراعية والالات الزراعية وهو يضارع الجوز التركى

ثامنا خشب الحور
لونة أصفر فاتح يميل الى البياض ألوانة مستقيمة ومندمجة خفيف الوزن طرى سهل يصلح للقشرة وأعمال النجارة الدقيقة والابلكاش والالات الزراعية

ادعو من الله ان نكون وفقنا فى تغطية الاخشاب الطبيعية
وان شاء الله البوست القادم هانتكلم عن الاخشاب المسطحة المصنعة والمعروفة فى لغة الكار بالمسطحات

الخميس، 29 مايو، 2008

الجزء التانى من انواع الخشب الطبيعى

المرة دى هانتكلم عن باقى اشهر انواع الخشب الطبيعى فى مصر
كان اخر حاجة قولناها فى البوست اللى فات : ثالثا : خشب الارو
يالا نكمل باقى

رابعا: خشب الماهوجنى
الخشب الماهجونى فى مصر يسمى بلغة الصنعة : موجنه
وتنقسم الموجنة الى موجنه مصبعة وفيها شكل الخشب او القشرة بتاعته على شكل اصابع طوليه زى الصور دى






وفيه منه المفجر اى له فاجورة .. والفاجوره هى تشكيلات فى عروق الخشب ربانيه الصنع تعطي له جمال زى الصور دى



او يكون شكل الفاجورة على هيئة دوامات زى الصور دى






وفى من قشرة خشب الموجنة ما يسمى بالقفص الصدرى لان فعلا شكلها زى كأنها صورة للقفص الصدرى

وطبعا القفص الصدرى بيبقى تحفة لما بيتعمل منه ضلف دواليب

ودى صور لقشرة موجنة قفص صدرى وياريت تلاحظوا التشابه بين الصور وبين القفص الصدرى للانسان




خشب الماهوجنى يختلف شكله عن اغلب انواع الاحشاب المستخدمة فى مصر

فكما هو واضح من الصور ان لونه يميل الى الاحمرار فيمكننا القول ان لونه بنى محمر غامق

ويستخدم فى صناعة الاثاث والابواب والباركيه فى الارضيات

الا انه لا يفضل استخدامه فى الابواب بسبب كبر معامل التمدد والانكماش فيه

وتستخدم قشرة الماهوجنى على نطاق واسع فى الدولايب خاصة فى دواخل الدواليب حيث تتميز برخص ثمنها


يعنى إيه قشرة الخشب؟؟

قشرة الخشب هى طبقة رقيقة جدا من الخشب لا يتعدى سمكها الواحد مليمتر ويتم استخدامها على نطاق واسع فى تغطية الاخشاب المسطحة كألواح الكونتر والإم دى إف MDF والابلاكاج وذلك لإضافة قيمة وجمال لهذه الاخشاب وان شاء الله سيتم الحديث عنها عندما نتحدث عن الاخشاب المسطحة او المصنعة


خامسا الخشب العزيزى

الخشب العزيزى من فئة الاخشاب الصنوبرية زيه زى الخشب الموسكى والبلوط الا ان سعره اعلى من الخشب الموسكى بكتير وذلك لما لتشكيلاته من روعه وانه خالى من العقد كالتى يتميز بها الخشب الموسكى
ولونه يميل الى الابيض او نقدر نقول انه ابيض مصفر شوية وبعض من انواعه يميل لونها الى اللون البيج كما سنرى فى الصور

وما يميزه ايضا فى قشرته ان قشرته اذا وضعت اما م الضوء فإنها تنير إناره ذاتيه قد لا يلاحظها الكثيرين
الا انى لاحظتها بنفسى حيث كنت امسك بقشرة وبالصدفة وضعتها اما شباك يدخل منه ضوء الشمس فإذا هى تنير ذاتيا وسبحان الله
ويستخدم الخشب العزيزى فى صناعة الابواب والشبابيك غرف السونا حيث انه مقاوم جيد للعوامل الجوية من برد وحر ومطر
ودى صورة للخشب قبل وبعد الدهان



ودى صور للخشب بأشكال مختلفة للفاجورة:

دى صورة لنوع منه لونها تقريبا ابيض

ودى صورة لنوع تانى منه وتقريبا لونها بيج مائل للبنى

سادسا الخشب البلوط :

خشب البلوط من نفس فصيلة خشب الموسكى والخشب العزيزى

ويتميز ايضا بلونه الفاتح اللى يميل الى الابيض

وله استخدامات عدة فى سواء فى صناعة الاثاث كغرف النوم مثلا او الابواب والشبابيك الا ان مش مشهور اوى زى الخشب الموسكى والعزيزى

والجدير بالذكر ايضا ان خشب البلوط يتخدم فى صناعة العود ألة العزف العربية

ودى شكل للفاجورة على شكل دوامات وتسمى وفاجورة دوامية الشكل غير منتظمة


ولا تصلح المسامير الحديد لتثبيت خشب البلوط وذلك بسبب المادة الكيميائية الطبيعية الموجودة فى هذا النوع من الخشب والتى تتسبب فى صدأ المسامير الحديد

ان شاء الله البوست القادم عن خشب التك وخشب الجوز التركى

الخميس، 22 مايو، 2008

انواع الاخشاب الشائعة فى مصر

لازم قبل ما ابتدى البوست دة أنوه على الاتى
أولا: جل من لا يسهو
يعنى لو حصل اى سهو او اى غلط من اى نوع احنا بكل ترحيب نقبل التعديل علينا ونقبل انكم تفكرونا

ثانيا : المعلومات اللى هنا مش مقصود بيها الناس المتخصصة فى الخشب او فى التصميم الداخلى بالعكس تماما
المعلومات هنا موجهة للناس اللى معندهاش اى خلفية عن الاخشاب ونوعها واسمها وشكلها
احنا حاولنا نبسط المعلومات على قد ما قدرنا

ثالثا : اهم حاجة احنا محتاجينها أرائكم وأسئلتكم
يالا نبتدى .. نقول بسم الله

الخشب هانقسمه الى قسمين رئيسيين

اولا: الاخشاب الطبيعية ( زى الزان والارو والموسكى..الخ)
ثانيا: اخشاب مصنعة او اخشاب مسطحات( الكونتر وال إم دى إف والابلاكاج ..الخ)

اولا: الاخشاب الطبيعة

وفى البوست دة هانتكلم عن ثلاث أنواع فقط من اشهر انواع الخشب فى مصر واللى بيكثر استخدامها فى المنازل والمكاتب والمحلات والفنادق وفى كل مكان

اولا: خشب الموسكى pine wood
دى صورته عشان تبئوا عارفينه
هو اكتر حاجة بتميز النوع دة من الخشب وجود العقد فيه

خشب الموسكى يعد من ارخص انواع الاخشاب الطبيعة فى مصر وطبعا كل ما العقد كترت فيه سعره يقل اكتر وخاصة العقد الخبيثة اللى هى ممكن تقع منه بعد التصنيع وطبعا ساعتها هايكون شكل المنتج النهائى سىء للغاية.

يعنى مثلا لو تم تصنيع ضلف مطبخ من الموسكى ذو العقد الخبيثة وبعد كدة العقد وقعت طبعا شكل الضلفة هايكون بشع وهى مخرومة
طيب والواحد يعرف العقد الخبيثة من العقد الطيبة ( الحميدة) ازاى؟؟

العقد الخبيثة بتكون سودة جدا كأنها محروقة وحواليه فراغ بسيط بينها وبين باقى لوح الخشب
لكن العقد اللى مافيش منها خوف هى العقد الفاتحة زى اللى فى الصورة اللى فوق

دى صورة لكنبة مصنوعة من خشب الموسكى ولو تلاحظوا العقد اللى فيها بسيطة ومع الدهان تقريبا مش باينة بالعكس بتزيد الخشب جمال

ودى ترابيزة مطبخ بالكراسى من خشب الموسكى وبرضه العقد اللى فيها بتديها جمال

ويستخدم خشب الموسكى قليل العقد فى صناعة غرف السونا ولكن يفضل فى صناعتها الخشب العزيزى

ومن اشهر استخدامات خشب الموسكى فى مصر ملل السراير والمطابخ وبعض انواع الانتريهات والابواب

==========

ثانيا: الخشب الزان

دة شكل الخشب الزان
ولو تلاحظوا ان لونه مائل للإحمرار شوية ومسامة ضيقة جدا ومافيهوش اى عقد
وخشب الزان مفضل جدا عند المصريين لانهم بيعتقدوا انه اقوى الانواع


وتلاقى الواحد يجيب الانتريه وفخور اوى انه من خشب الزان لانه خشب بيستحمل ويوقلك خد راحتك فى القعدة واتجعص على الاخر دة خشب زان ولا يهمك


المهم ان فى منطقة زى المناصرة فيه نوع تانى من الاخشاب انا مش فاكرة اسمه دلوقتى تقريبا اسمه مرانتى هو شبه الزان وللأسف مش اى حد يفرقهم عن بعض وبيستخدم فى صناعة غرف النوم وطبعا هو مش بقوة خشب الزان وبالتالى الغرفة لاتصمد كثيرا


طيب والمشترى العادى يعرف الفرق ازاى؟؟
بصراحة هو صعب لكن ممكن عن طريق سعر الغرفة اللى هاتشتريها سواء نوم او سفرة او انتريه


يعنى مثلا فى زماننا دة لا يمكن اى غرفة نوم مصنوعة من الخشب الزان تقل عن 10000 ج بأى حال من الاحوال وطبعا دة سعر رخيص جدا اللى انا بقوله دة وبالتالى لو غرفة نوم سعرها 7000ج او 8000ج تأكد انها مش زان او على الاقل مش كلها زان



ثالثا: خشب الارو


دى صورته

خشب الارو من الاخشاب الصلبة المتينة والى كمان شكلها حلو وبتدى فخامة

يعنى لو عملنا باب من الموسكى والتانى من الزان والتالت من الارو هتلاقى افخم باب فيهم شكلا هوالباب الارو

خشب الارو اللى مصر نوعين

أرو يوغوسلافى ودة الارخص والسبب ان الرطوبة فيه اكتر
وأرو أمريكى ودة الاغلى لان رطوبته اقل
ويبدأ سعر الارو من 6000ج الى 10000ج للمتر المكعب
وبمناسبة المتر المكعب أحب اقولكم حاجة مهمة
ان لما الواحد يقول متر خشب الارو مثلا 600ج دة معناه المتر المكعب من الخشب وطبعا الكلام دة بينطبق على جميع انواع الاخشاب الطبيعية وبلغة الصنعة نسميه الخشب الماسيف
هانقول مثلا
لما تيتجى تتفق مع نجار او مهندس عشان يعملك كرسى مثلا
ازاى تحسب كمية الخشب الموجودة فى الكرسى دة
مثلا رجل الكرسى ليها طول وعرض وارتفاع مثلا طول الرجل 5 سم وعرضها 5 سم وإرتفاعها 40سم
عشان نعرف كمية الخشب المستخدمة فى رجل الكرسى دة
هانحول السنتيمتر الى متر وتضرب الارقام اللى هاتطلع لك دى فى بعض هتلاقى الناتج اللى طلع لك 0.001ولما تضرب الرقم دة اللى هو واحد من ألف من المتر فى ثمن المتر المكعب للخشب الارو هانقول مثلا 6000ج الناتج النهائى هايكون 6ج يعنى سعر رجل الكرسى تساوى 6ج
وبالطريقة دى تقدر تحسب اى حاجة ومحدش يضحك عليك

فى نقطة تانية مهمة جدا فى الاخشاب الا وهى الرطوبة
يعنى ايه رطوبة الخشب؟
لما نقول ان قطعة الخشب دى مرطبة يعنى فيها ميه ووزنها بيكون اتقل من وزن مثيلاتها المجففة
وطيب ايه مشكلة الخشب اللى فيه رطوبة ؟
المشكلة انه ممكن يلف يعنى يتقوس وبالتالى المنتج هايبوظ وممكن يتشقق بعد الدهان وبالتالى الدهان هيبوظ
طيب واحنا نعرف ازاى ان الخشب دة فيه رطوبة
طبعا هو بالنسبة لغير المتخصصين بيكون مش سهل
لان فيه جهاز لقياس درجة رطوبة الخشب وطبعا دة بيستخدم فى المصانع الكبيرة لان المصانع دى بتشترى كميات كبيرة من الخشب بالالاف الجنيهات وبالتالى لازم تطمن على الخام قبل التصنيع
بس ممكن وانت بتشترى الخشب من المغلأ وهو المكان اللى بيتباع فيه الاخشاب تسأل اذا كان عندهم جهاز قياس رطوبة وطبعا اغلبهم بيكون عنده لان المغلأ هو كمان بيشترى كميات كبيرة
واهم حاجة لما تقيس الرطوبة انها ماتزيدش عن 16

اعتقد كفاية كدة المرة دى
وفى البوست الجاى ان شاء الله نكمل باقى انواع الخشب الطبيعى الماهوجنى والبلوط والعزيزى
سلام عليكم

الأحد، 18 مايو، 2008

اول بوست... نقول بسم الله

السلام عليكم
زوجى وأنا مهندسين ديكور او بمعنى اكثر دقة (مصمم داخلى) دة الاسم الرسمى لمهنتنا
المهم اننا قررنا نعمل البلوج دة عشان نحاول نفيد اكبر عدد من الناس
واى حد عنده سؤال يخص الاخشاب خاصة او التصميمات الداخلية أو كل ما يتعلق بالديكورعامة يبعت لنا السؤال واحنا هنحاول نرد عليه
طيب احنا ايه اللى خلانا نفكر فى اننا نقول للناس معلومات عن الاخشاب؟؟
سببين
اول سبب : اننا كنا مرة ماشين فى الشارع ولقينا معرض اثاث عارض مطبخين من خشب الموسكى واحد لونه فاتح والتانى لونه غامق
ولما سألنا البائع عن سعر كل واحد فيهم قال ان الغامق اغلى بحوالى 2000 جنيه
- ليه ياسيدى ؟؟
- عشان الفاتح دة خشب موسكى والغامق دة خشب زان
طبعا انا وزوجى كتمنا ضحكنا لان البائع لو كان يعرف اننا بنفهم فى انواع الخشب ما كنش غشنا وطالما احنا اتعرضنا لهذا النوع من الغش إذن اكيد ناس كتير اتعرضوا له وهم يا عينى ما يعرفوش الفرق بين انواع الخشب
السبب التانى
لظروف مهنتنا فطبعا بنتعامل مع ناس كتير مهتمة بالاخشاب والديكور وخاصة العرايس والعرسان
واغلبهم هم واهلهم مش فاهمين اى حاجة كل اللى فاهمينه ان مافيش احلى من خشب دمياط
ولازم البنت تشترى عفشها كله من دمياط من المحل الفلانى دة اشهر واحد هناك عشان بنت خالتها اشترت منه وبنت عمها
اشترت منه
وطبعا هى مش اقل منهم دة غير انها لازم تشترى العفش فخم وضخم بصرف النظر عن مساحة المكان اللى هانحط فيه العفش دة
طبعا كل دة كلام فارغ
اولا عفش دمياط مش هو احلى عفش لان فيه كتيرمن الغش اللى ما حدش يتخليه
يعنى مثلا تروح تشترى غرفة البائع يقولك:
- لو جدع شيل ضلفة الدولاب دة خشب ماسيف يا بيه ( ماسيف يعنى خشب طببيعى )
وطبعا ماتقدرش تشيلها فتقول:
- يا سلام ادى الخشب ولا بلاش
ولما تتتفتح الضلفة دى من جوة هل ممكن تتخيل انها محشية رمل او صبة ؟؟ ( الصبة دى عبارة عن جبس بمية او نشارة بالغرا مع ورق وزبالة)
وطبعا المصيبة دى ممكن تعمل حشرات وفعلا والله العظيم واحدة صديقة لينا اصرت انها تشترى حجرة نومها من هناك من غير حتى ما تستشير اى حد بيفهم وطبعا لما الحجرة ركبت وابتدت صديقتى تستعملها وبعد تلات سنوات بالظبط من جوزاها واستخدامها للغرفة بدأت الزبالة اللى جوا الخشب تعمل حشرات والحشرات ابتدت تاكل الخشب وتخرج بره واصيبت صديقتى بالفزع وكلمتنى قالت لى الحقينى رحت انا وزوجى واخدنا الحجرة للورشة واول ما فتحنا الضلف فوجئنا بما يخرج منها من حشرات بسبب الصبة المكونة من قصاقيص الخشب والنشارة والورق .. وطبعا صديقتى من كتر قرفها من اللى شافته رمت الغرفة كلها واشترت غرفة تانية من شركة تصنيع أثاث معروفة وموثوق فيها

نوع تانى من انواع غش الخشب فى دمياط

تروح تشترى صالون زان .. يقولك البائع دة زان يابيه ميه ميه لما تتفرج عليها تلاقى ظهر الكنبة مثلا كذا لون وكذا قطعة خشب متوصلين ببعض عن طريق الغرا تقوله طيب ليه الكنبة مش كلها لون واحد ( دة طبعا لما تشوف الطقم قبل الدهان ) يقولك البائع : يا بيه دة خشب طيبعى دة زان بتاع ربنا مش ممكن يبقى كله لون واحد دة جاى من الشجرة على هنا على طول وكل قطعة حسب لون الشجرة اللى جت منها
وطبعا الكلام دة مش صح .. ليه؟؟
لان المفروض ان ظهر الكنبة مثلا عشان يكون صح بيتفصل من قطعه خشب واحدة
والطريقة دى طبعا هاتتسبب فى كمية كبيرة من هادر الخشب ودة طبعا مايعجبش التجار وبالتالى بيعملوه من قصاقيص الزان وبيغروها مع بعض لحد ما يتكون عندهم مايسمى بالطبلية ويبداوا يقصوا منها ظهر الكنبة فبالتالى بيكون ظهر الكنبة كذا لون لانه مش من قطعة خشب واحدة ومع الاستخدام الغرا بيفك ويبتدى ظهر الكنبة فى التشقق ويضعف وينهار مع الاستخدام
ولما الطريقة دى اتكشفت للناس فأصبح التجار حاليا بعد ما يعملوا الكنبة من قصاقيص الخشب اللى كل قطعة فيه لونها يختلف عن اللى جنبها .. يقوم صانع الكنبة بعد ما يصنعها يحرقها كلها اوكسجين عشان تبئى كلها لون واحد وبالتالى لما تشوفها تلاقى لون الزان فيها فاتح جدا يكاد يكون ابيض او اوف وايت فلما انت تشوفها كدة تقوله :
- ليه لون الخشب فاتح اوى كدة مش دة زان ولازم يكون فيه احمرار فى لونه؟؟ يقوم البائع يقولك:
- يا بيه دة زان نمرة واحد ودرجة اولى.. دة انضف نوع عشان كدة فاتح الغامق بيكون درجة تانية وتالته واحنا هنا بنستعمل الغالى بتاع التصدير ( مع ان مصر بتستورد الزان ) وبالتالى مافيش حاجة اسمها خشب تصدير لاننا مش بنزرع الخشب الزان فى مصر من اصله.
دى بعض المعلومات البسيطة عن انواع الغش فى الصناعه والبوست الجاى ان شاء الله هايكون عن انواع الخشب وبالتالى اللى عنده اى سؤال يحب يسأله احنا هنحاول نجاوب على قد معرفتنا ولو مانعرفش هانسأل ولو ما وصلناش لاجابة هانقول ما نعرفش عشان احنا اكتر حاجة بضايقنا لما نسأل واحد سؤال ويكون مش عارف الاجابة يقوم يفتى بالغلط ويغرق الى قدامه

نرحب بإستفساراتكم وربنا يقدرنا ونجاوب عليها ويارب تكون المدونة دى فى ميزان حسانتنا