الخميس، 22 مايو، 2008

انواع الاخشاب الشائعة فى مصر

لازم قبل ما ابتدى البوست دة أنوه على الاتى
أولا: جل من لا يسهو
يعنى لو حصل اى سهو او اى غلط من اى نوع احنا بكل ترحيب نقبل التعديل علينا ونقبل انكم تفكرونا

ثانيا : المعلومات اللى هنا مش مقصود بيها الناس المتخصصة فى الخشب او فى التصميم الداخلى بالعكس تماما
المعلومات هنا موجهة للناس اللى معندهاش اى خلفية عن الاخشاب ونوعها واسمها وشكلها
احنا حاولنا نبسط المعلومات على قد ما قدرنا

ثالثا : اهم حاجة احنا محتاجينها أرائكم وأسئلتكم
يالا نبتدى .. نقول بسم الله

الخشب هانقسمه الى قسمين رئيسيين

اولا: الاخشاب الطبيعية ( زى الزان والارو والموسكى..الخ)
ثانيا: اخشاب مصنعة او اخشاب مسطحات( الكونتر وال إم دى إف والابلاكاج ..الخ)

اولا: الاخشاب الطبيعة

وفى البوست دة هانتكلم عن ثلاث أنواع فقط من اشهر انواع الخشب فى مصر واللى بيكثر استخدامها فى المنازل والمكاتب والمحلات والفنادق وفى كل مكان

اولا: خشب الموسكى pine wood
دى صورته عشان تبئوا عارفينه
هو اكتر حاجة بتميز النوع دة من الخشب وجود العقد فيه

خشب الموسكى يعد من ارخص انواع الاخشاب الطبيعة فى مصر وطبعا كل ما العقد كترت فيه سعره يقل اكتر وخاصة العقد الخبيثة اللى هى ممكن تقع منه بعد التصنيع وطبعا ساعتها هايكون شكل المنتج النهائى سىء للغاية.

يعنى مثلا لو تم تصنيع ضلف مطبخ من الموسكى ذو العقد الخبيثة وبعد كدة العقد وقعت طبعا شكل الضلفة هايكون بشع وهى مخرومة
طيب والواحد يعرف العقد الخبيثة من العقد الطيبة ( الحميدة) ازاى؟؟

العقد الخبيثة بتكون سودة جدا كأنها محروقة وحواليه فراغ بسيط بينها وبين باقى لوح الخشب
لكن العقد اللى مافيش منها خوف هى العقد الفاتحة زى اللى فى الصورة اللى فوق

دى صورة لكنبة مصنوعة من خشب الموسكى ولو تلاحظوا العقد اللى فيها بسيطة ومع الدهان تقريبا مش باينة بالعكس بتزيد الخشب جمال

ودى ترابيزة مطبخ بالكراسى من خشب الموسكى وبرضه العقد اللى فيها بتديها جمال

ويستخدم خشب الموسكى قليل العقد فى صناعة غرف السونا ولكن يفضل فى صناعتها الخشب العزيزى

ومن اشهر استخدامات خشب الموسكى فى مصر ملل السراير والمطابخ وبعض انواع الانتريهات والابواب

==========

ثانيا: الخشب الزان

دة شكل الخشب الزان
ولو تلاحظوا ان لونه مائل للإحمرار شوية ومسامة ضيقة جدا ومافيهوش اى عقد
وخشب الزان مفضل جدا عند المصريين لانهم بيعتقدوا انه اقوى الانواع


وتلاقى الواحد يجيب الانتريه وفخور اوى انه من خشب الزان لانه خشب بيستحمل ويوقلك خد راحتك فى القعدة واتجعص على الاخر دة خشب زان ولا يهمك


المهم ان فى منطقة زى المناصرة فيه نوع تانى من الاخشاب انا مش فاكرة اسمه دلوقتى تقريبا اسمه مرانتى هو شبه الزان وللأسف مش اى حد يفرقهم عن بعض وبيستخدم فى صناعة غرف النوم وطبعا هو مش بقوة خشب الزان وبالتالى الغرفة لاتصمد كثيرا


طيب والمشترى العادى يعرف الفرق ازاى؟؟
بصراحة هو صعب لكن ممكن عن طريق سعر الغرفة اللى هاتشتريها سواء نوم او سفرة او انتريه


يعنى مثلا فى زماننا دة لا يمكن اى غرفة نوم مصنوعة من الخشب الزان تقل عن 10000 ج بأى حال من الاحوال وطبعا دة سعر رخيص جدا اللى انا بقوله دة وبالتالى لو غرفة نوم سعرها 7000ج او 8000ج تأكد انها مش زان او على الاقل مش كلها زان



ثالثا: خشب الارو


دى صورته

خشب الارو من الاخشاب الصلبة المتينة والى كمان شكلها حلو وبتدى فخامة

يعنى لو عملنا باب من الموسكى والتانى من الزان والتالت من الارو هتلاقى افخم باب فيهم شكلا هوالباب الارو

خشب الارو اللى مصر نوعين

أرو يوغوسلافى ودة الارخص والسبب ان الرطوبة فيه اكتر
وأرو أمريكى ودة الاغلى لان رطوبته اقل
ويبدأ سعر الارو من 6000ج الى 10000ج للمتر المكعب
وبمناسبة المتر المكعب أحب اقولكم حاجة مهمة
ان لما الواحد يقول متر خشب الارو مثلا 600ج دة معناه المتر المكعب من الخشب وطبعا الكلام دة بينطبق على جميع انواع الاخشاب الطبيعية وبلغة الصنعة نسميه الخشب الماسيف
هانقول مثلا
لما تيتجى تتفق مع نجار او مهندس عشان يعملك كرسى مثلا
ازاى تحسب كمية الخشب الموجودة فى الكرسى دة
مثلا رجل الكرسى ليها طول وعرض وارتفاع مثلا طول الرجل 5 سم وعرضها 5 سم وإرتفاعها 40سم
عشان نعرف كمية الخشب المستخدمة فى رجل الكرسى دة
هانحول السنتيمتر الى متر وتضرب الارقام اللى هاتطلع لك دى فى بعض هتلاقى الناتج اللى طلع لك 0.001ولما تضرب الرقم دة اللى هو واحد من ألف من المتر فى ثمن المتر المكعب للخشب الارو هانقول مثلا 6000ج الناتج النهائى هايكون 6ج يعنى سعر رجل الكرسى تساوى 6ج
وبالطريقة دى تقدر تحسب اى حاجة ومحدش يضحك عليك

فى نقطة تانية مهمة جدا فى الاخشاب الا وهى الرطوبة
يعنى ايه رطوبة الخشب؟
لما نقول ان قطعة الخشب دى مرطبة يعنى فيها ميه ووزنها بيكون اتقل من وزن مثيلاتها المجففة
وطيب ايه مشكلة الخشب اللى فيه رطوبة ؟
المشكلة انه ممكن يلف يعنى يتقوس وبالتالى المنتج هايبوظ وممكن يتشقق بعد الدهان وبالتالى الدهان هيبوظ
طيب واحنا نعرف ازاى ان الخشب دة فيه رطوبة
طبعا هو بالنسبة لغير المتخصصين بيكون مش سهل
لان فيه جهاز لقياس درجة رطوبة الخشب وطبعا دة بيستخدم فى المصانع الكبيرة لان المصانع دى بتشترى كميات كبيرة من الخشب بالالاف الجنيهات وبالتالى لازم تطمن على الخام قبل التصنيع
بس ممكن وانت بتشترى الخشب من المغلأ وهو المكان اللى بيتباع فيه الاخشاب تسأل اذا كان عندهم جهاز قياس رطوبة وطبعا اغلبهم بيكون عنده لان المغلأ هو كمان بيشترى كميات كبيرة
واهم حاجة لما تقيس الرطوبة انها ماتزيدش عن 16

اعتقد كفاية كدة المرة دى
وفى البوست الجاى ان شاء الله نكمل باقى انواع الخشب الطبيعى الماهوجنى والبلوط والعزيزى
سلام عليكم

‏هناك 40 تعليقًا:

أحمد عبد الفتاح يقول...

ياااااااااااااه
متصووروش ببقس فرحان قد ايه لما الاقي مدنة مش بتتكلم في السياسة
بس يريت تقدموا جديد
يعني تتكلموا عن الديكور للناس البسيطة مش للاغنياء بس ذي ما كل بتوع الديكور بيعملوا
عارفين انا عندي حلم صغنون قوي عايز اقول لكم عليه
نفسي انا الي اصمم كل عفش بيتي ان شاء الله
واعمل فيه قعده عربي وحاجات كده من قبيل الخزعبلات كلها في دماغي بس مش بعرف اخرجها عالورق او احكيها قوي
مبروك المدونة اعتبروني من دلوقت من زبائنكم الدائمين
اقصد قرائكم
تحياتي

tarek momen يقول...

الله ينور يا باشمهندزين
ياريت موضوع المدونات المتخصصة ينتشر ونشوف مثلا مدونةالمحامي للاستشارات
مدونة السباكة للاصلاحات البسيطة
وهكذا

جبهة التهييس الشعبية يقول...

ولا عمري كنت ح اعرف الحاجات دي ولا ح افهمها الا لما شرحتيها بالاسلوب السهل الممتنع ده

انا بصيت امبارح على البوست وقريت اول كلمتين قلت لااااااااا ده بوست عايز بال رايق وقعدة
بس بجد استمتعت جدا

جبهة التهييس الشعبية يقول...

طارق
مدونة سباكة؟
:))
انت عندك الحمام بيخر وللا ايه؟
:))

monaliza يقول...

بجد جزاكم الله خيرا
عرفتونى حاجات كتير مكنتش عارفاها وخصوصا انكم اوضحتم بالصور
مشكورة ليكم جدا وفى انتظار المزيد
وبالتوفيق دائما

tamer.sala7 يقول...

انا بضم صوتي لصوت طارق عايزين مدونة في السباكة والاسشتارت القانونية علشان لما يتقبض علينا يقفو معانا

مين أنا يقول...

أولاً مبروك على المدونة ... بجد فكرة رائعة إن يكون فيه ناس متخصصين يشاركوا الآخرين خبرتهم ,بالمناسبة إن شاء الله يجزيكم خير لأن من تعلم بابًا من العلم فعلمه بنى الله له به قصرًا في الجنه كما تعلمون ..
ثانيًا: بلاش كسل وعاوزين بوستات كتير عشان المدونه تستمر ...
ثالثًا: أنا مهندس معماري وإذا فيه أي طريقة للتعاون مستعد إني أتعاون معاكم ...
رابعًا: أتمنى لكم كل التوفيق والنجاح...
خامسًا : شكرًا شكرًا شكرًا

Amh يقول...

جزاكم الله خيرا على النصائح الثمينه وياليتكم لو تدرجتم مثلا في اعمال النجاره البسيطه

ابو فراس يقول...

حلوة المعلومات دى ومفيدة جدا وياريت لو فية معلومات عن الموبيليا الصينى... تسلم يا باشمهندز

koosha يقول...

السلام عليكم ورحمه الله
الرجاء مساعدتي في شراء جهاز يدوي بورتبل لقياس نسبه الرطوبه في الخشب لو في شركه او مكان معين متوفر فيه الجهاز ده ابقا شاكرا لكم
احمد سالم
0100620406
hamadaa00@hotmail.com

goodman يقول...

بجد البلوج رائع جدا

وكلامك بحس فيه بالذوق العالى

و عايز استشارة لو ممكن

عندى فى شقتى لسه موش ركبت فيها ولا باب

لانى مستنى حبه

والحت الظروف ان اعمل باب مطبخ واركبة

فعايز يارلايت لو شوية نصايح عشان اعمل باب مطبخ صح ؟؟

hamdy abu frakh يقول...
أزال المؤلف هذا التعليق.
mmafawzy2005 يقول...

هل خشب الزان غامق اللون او به خطوط سوداء

باب النجار يقول...

mmafawzy2005
خشب الزان لونه يميل الى الاحمرار ولاتوجد به خطوط سوداء

غير معرف يقول...

السلام عليكم بالنسبه للتعليق ما شاء الله ويعني المعلومات صحيحه ميه بالميه
بس عندي سؤال الارو بمصر هل هو الاش
ويا ريت بالمره الجايي تحكي عن الونجي والميبل والافريكيه بس بشكل مفصل شوي ياريت
والله يعطيك الف عافيه ما قصرت

باب النجار يقول...

لأ الارو فى مصر يعنى اوك oak
الاش هو خشب البلوط

غير معرف يقول...

على فكرة صورة الخشب الارو النته حطتها دي مش خشب ارو ده خشاب بلوط

غير معرف يقول...

على فكرة صورة الخشب الارو النته حطتها دي مش خشب ارو ده خشاب بلوط

غير معرف يقول...

على فكرة صورة الخشب الارو النته حطتها دي مش خشب ارو ده خشاب بلوط

سبهللة يقول...

لأ دى صورة خشب أرو مفجر
مش مسنن
انا متأكدة

hanaa يقول...

بجد جزاكم الله كل خير عنا المعلومات صحيحه ومشروحه بشكل ميسر جدا وافادتنى بس اتمنى تتكلموا فى بوست تانى عن اقصى مساحه للمسطحات اللى ممكن تؤخذ من الخشب الماسيف بالنسبه لكل نوع وكمان ياريت تكلمونا عن انواع الأخشاب المصنعه زى الكونتر واسعارها وربنا يجعله فى ميزان حسناتكم

Mabrouk يقول...

هل توجد احصائيات عن السوق المصرى والعربى لكمية الاخشاب التى تستورد لسد حاجة السوق؟
يمكن نجد حلا لانتاج خشب من الطبيعة المصرية حيث ينتج مخلفات زراعية تصل 33 مليون طن سنويا تكفى المنطقة العربيه من الاخشاب

غير معرف يقول...

شكرا معلوماتك صحيحة انا عندي مغلآ خشب في الضفة نابلس؟همام شحروج

mohamed يقول...

شكرا علي المعلومه

غير معرف يقول...

اولا ميرسى جدا على تعبك ونصايحك ,ثانيا انا مخطوبة وحد قالى على مفكو حلوان وكنت عايزة اعرف اذا كان خشبة كويس ومكان مضمون ولا لاه لانى كنت فاكرة انى هاشترى على طول لكن قالوا لى انى اختار وبعد20 -30يوم استلم كنت عايزة اعرف ممكن يكونوا بيعرضوا حاجه ويعملوا حاجة تانية خشبها مش كويس,ارجو الرد بسرعة لانى مسافرة الاسبوع الجاى

eng heba يقول...

بجد انتو مدونة جميلة جدا واسلوبكو بسيط اووووووووي وسهل جدا على اي حد انه يفهمه
بس بعد اذنكو انا ليا طلب انا مطلوب مني بحث عن الاخشاب والبشمهندس عاوزه بصور انا لقيت حاجات كتير جدا عنها بس كلها كلام فلو ممكن تساعدوني وتقولولي اقدر اجيب معلومات عن الاخشاب وطريقة صناعتها وانواعها بالصور بجد تبقو ساعدتوني مساعدة كبيرة اوووووووووووي لان البشمهندس هيحط على البحث ده تقييم التدريب

AdhamSabry يقول...

شكرا على المعلومات القيمة و نتمنى الاستمرار

انا عندى سؤال . حاليا انا هبدأ حاجة كده و ان شاء الله تبقى مشروع قريب . هعمل حاجات زى التحف مش تحف بالظبط زيها يعنى حاجات صغيرة تتحط زينة المهم هتبقى اشكال فيها البسيط و فيها المعقد و هتبقى خشبية هكنت بسأل ايه افضل انواع الخشب اللى ممكن استعمله عشان سمعت ان فيه انواع مينفعش يتعمل فيها دوارانات و ازاى الونها مثلا لون اسود بس يكون زى الاثاث فى خطوط كده تجمل شكلها و اخيرا ايه افضل طريقة عشان اربط قطع خشبية صغيرة ببعض غرة ولا مسامير و شكراا

غير معرف يقول...

بجد الله ينور علي الشرح الجامد والسهل ده وخفة الدم اللي في الكلام اللي بتخلي الواحد بيقرا وهو مستمتع

RIVALDO يقول...

بجد الله ينور علي الشرح الجامد والسهل ده وخفة الدم اللي في الكلام اللي بتخلي الواحد بيقرا وهو مستمتع

غير معرف يقول...

فعلاباب النجار .....
المعلومات غير دقيقة لان غرفة النوم لاتقاس بالسعر مثل غرقة النوم 10000 ليس كله زان لكن تصنع من عديدخامات مثل الكونتر او الكبس والزان وMDF والابلاكاش ونوع الدهان سوءكان استر أوبوليستر أودوكووهذا مفهوم غير صحيح عندالزبائن WAEL_KAMAL76@YAHOO.COM
ت:0161841595 - 0123022143

غير معرف يقول...

انا عايز استفسر لو عايز اعمل اوضة نوم عموله هتحتاج كام متر خشب زان؟

غير معرف يقول...

انا عاوزه اعرف معلومات عن خشب الكونتر وانواعه واستخدماته وطريقه عمله و ياريت الرد عشان ده هيسعدنى فى البحث

tera 4 tech يقول...

ماشاء الله
صفحة جميله

نرجو المزيد والتقدم ان شاء الله لكم

غير معرف يقول...

assalamo alaikom
it is very very good blog iam very happy to see this information
iam egyption live in italy ahave an ammount of wood it is about 50 mq
i need your helb i want to exprt it to egypte as i lern from your blog it arow wood i need to be informed about its brice and
please send me your help on e mail
cairolano@yahoo.com
thank you very much

Eman Seif يقول...

اسلوبك جميل وبسيط
وانا استفدت جداااااااااااا
جزاكم الله خير

ayman72 يقول...

هل فيه جدول كميات بمقاسات الأبواب حتى أستطيع تحديد تكلفة الباب الخشب بمختلف مقاساته حتى اتمكن من تسعير منتجات ورشتي بالسعر العادل وشكرا
TRAVELERBIRD72@GMAIL.COM

غير معرف يقول...

عاوزة استفسر عن حاجة ضروري
دلوقتي اغرف السفرة المودرن في منها مصري ومنها صيني أو مصري متصنع بخشب صيني او مضغوط
المهم لما نزلت اختار عجبتني سفرة بس شاكة انها مش خشب طبيعي
يعني الكرسي ضخم لكن وزنه مش متناسب مع حجمه و الفينيش بتاعه مفيهوش خربوشة
عارف انت الاثاث المصري دايما نلقى حباية هنا و ل هنا تحت الدهان لكن دا ناعم
اعرف افرق ازاي بين الطبيعي و المضغوط لو صاحب المعرض حسيته بيكدب ؟؟؟؟؟؟؟؟؟؟؟؟

غير معرف يقول...

هل يوجد انواع مختلفة من الخشب الزان الرومانى الاحمر ؟ وما السعر الغالب لسفرة كلاسيكية تتكون من 8 كراسى وسفرة ونيش وتحتوى على اويمات ؟ حيث عندى اسمع اسعار متفاوتة بطريقة كبيرة مابين نجار واخر وجميعهم يؤكدون انهم سوف يصنعونها من الخشب الزان الرومانى ؟

أبو خالد للاخشاب يقول...

تسلم يا م. احمد
اسمحلي أقدم لكم هديه صغيره عباره عن معلومات فنيه منظمه بشكل سهل عن جميع انواع الأخشاب مثل الموسكي و البياض و الزان و الارو و البيتش باين و الموجنه... و كذلك جميع انواع المسطحات مثل الابلاكاش و الكونتر و الفاير بأنواعه على موقعنا WWW.WOODSHOP.COM.EG
أو متابعه صفحتنا على الفيس بوك
www.facebook.com/woodshopeg

محمود المليجي يقول...

اشكرك كتيييير جداجزاكم الله خيرا لحمايتنا من التجار المغالين في الاسعار