الخميس، 29 مايو 2008

الجزء التانى من انواع الخشب الطبيعى

المرة دى هانتكلم عن باقى اشهر انواع الخشب الطبيعى فى مصر
كان اخر حاجة قولناها فى البوست اللى فات : ثالثا : خشب الارو
يالا نكمل باقى

رابعا: خشب الماهوجنى
الخشب الماهجونى فى مصر يسمى بلغة الصنعة : موجنه
وتنقسم الموجنة الى موجنه مصبعة وفيها شكل الخشب او القشرة بتاعته على شكل اصابع طوليه زى الصور دى






وفيه منه المفجر اى له فاجورة .. والفاجوره هى تشكيلات فى عروق الخشب ربانيه الصنع تعطي له جمال زى الصور دى



او يكون شكل الفاجورة على هيئة دوامات زى الصور دى






وفى من قشرة خشب الموجنة ما يسمى بالقفص الصدرى لان فعلا شكلها زى كأنها صورة للقفص الصدرى

وطبعا القفص الصدرى بيبقى تحفة لما بيتعمل منه ضلف دواليب

ودى صور لقشرة موجنة قفص صدرى وياريت تلاحظوا التشابه بين الصور وبين القفص الصدرى للانسان




خشب الماهوجنى يختلف شكله عن اغلب انواع الاحشاب المستخدمة فى مصر

فكما هو واضح من الصور ان لونه يميل الى الاحمرار فيمكننا القول ان لونه بنى محمر غامق

ويستخدم فى صناعة الاثاث والابواب والباركيه فى الارضيات

الا انه لا يفضل استخدامه فى الابواب بسبب كبر معامل التمدد والانكماش فيه

وتستخدم قشرة الماهوجنى على نطاق واسع فى الدولايب خاصة فى دواخل الدواليب حيث تتميز برخص ثمنها


يعنى إيه قشرة الخشب؟؟

قشرة الخشب هى طبقة رقيقة جدا من الخشب لا يتعدى سمكها الواحد مليمتر ويتم استخدامها على نطاق واسع فى تغطية الاخشاب المسطحة كألواح الكونتر والإم دى إف MDF والابلاكاج وذلك لإضافة قيمة وجمال لهذه الاخشاب وان شاء الله سيتم الحديث عنها عندما نتحدث عن الاخشاب المسطحة او المصنعة


خامسا الخشب العزيزى

الخشب العزيزى من فئة الاخشاب الصنوبرية زيه زى الخشب الموسكى والبلوط الا ان سعره اعلى من الخشب الموسكى بكتير وذلك لما لتشكيلاته من روعه وانه خالى من العقد كالتى يتميز بها الخشب الموسكى
ولونه يميل الى الابيض او نقدر نقول انه ابيض مصفر شوية وبعض من انواعه يميل لونها الى اللون البيج كما سنرى فى الصور

وما يميزه ايضا فى قشرته ان قشرته اذا وضعت اما م الضوء فإنها تنير إناره ذاتيه قد لا يلاحظها الكثيرين
الا انى لاحظتها بنفسى حيث كنت امسك بقشرة وبالصدفة وضعتها اما شباك يدخل منه ضوء الشمس فإذا هى تنير ذاتيا وسبحان الله
ويستخدم الخشب العزيزى فى صناعة الابواب والشبابيك غرف السونا حيث انه مقاوم جيد للعوامل الجوية من برد وحر ومطر
ودى صورة للخشب قبل وبعد الدهان



ودى صور للخشب بأشكال مختلفة للفاجورة:

دى صورة لنوع منه لونها تقريبا ابيض

ودى صورة لنوع تانى منه وتقريبا لونها بيج مائل للبنى

سادسا الخشب البلوط :

خشب البلوط من نفس فصيلة خشب الموسكى والخشب العزيزى

ويتميز ايضا بلونه الفاتح اللى يميل الى الابيض

وله استخدامات عدة فى سواء فى صناعة الاثاث كغرف النوم مثلا او الابواب والشبابيك الا ان مش مشهور اوى زى الخشب الموسكى والعزيزى

والجدير بالذكر ايضا ان خشب البلوط يتخدم فى صناعة العود ألة العزف العربية

ودى شكل للفاجورة على شكل دوامات وتسمى وفاجورة دوامية الشكل غير منتظمة


ولا تصلح المسامير الحديد لتثبيت خشب البلوط وذلك بسبب المادة الكيميائية الطبيعية الموجودة فى هذا النوع من الخشب والتى تتسبب فى صدأ المسامير الحديد

ان شاء الله البوست القادم عن خشب التك وخشب الجوز التركى

هناك 30 تعليقًا:

tamer.sala7 يقول...

في حاجة غلط ولا انا اللي مش فاهم ؟؟

tamer.sala7 يقول...

ايوة كدة يبقي كان في حاجة غلط والحمد لله اتصلحت
ربنا معاكم بس لسة المشوار طويل اوي يا ريت تكملو من غير زهق

funckydoctor يقول...

ايه الكلام الكبير ده
ربنا معاكم

nonoymm يقول...

السلام عليكم
الله يجازيكم خير يارب
جايين لي في وقتكم بجد
دلوقتي انا بدهن حجرة نوم كانت مدهونة دوكو قبل كدة يا ترى عادي لو دهن النجار عليها دوكو ايه رايك ولا ممكن يحصل حاجة للخشب واللون اللي كان مدهون يطغى مثلا عليه ايه رايك؟؟؟؟
وعاوزة اشتري سريرين شمعدان ممكن تقوليلي الجأ لاي نوع خشب افضل واتنصحيني بايه في الشرا بالنسبة لنوع الخشب؟؟؟
لاني عاوزة اشتريه على لونه
كمان عاوزة اشتري سفرة اول الشهر الجاي 7 يعني يا ترى الاقي عندك نصايح خاصة بالخشب بتاعها وكدة يعني
معلش افيدوني افادكم الله
تقديري لكم فالمدونة جديرة بالمتابعة واوعوا تزهقوا
تحياتي

باب النجار يقول...

اختى عاشقة النقاب
بالنسبة للغرفة المدهونة دوكو
اذا اردتى اعادة دهانها مرة اخرى لتغيير اللون يجب اولا ازالة اللون القديم اللى هو من الدوكو وذلك عن طريق استخدام مزيل دهانات
(paint remover) ودة موجود عن كل الموانين يعنى المحلات اللى بتبيع خامات الحدايد والبويات
وذلك لان اذا تم الدهان الجديد على القديم فبالتالى اللون هايتغير مع الوقت ويبقع ويقشر
لان قطعة الخشب المدهونة قبل كدة تسمى زفرة بلغة الصنعة وعشان نشيل زفارتها لازم نرجعها على الخشب تانى مع تمام ازالة اللون القديم
وما تسمعيش كلام اى حد يقول غير كدة
وبالنسبة للسريرن او اى سرير من الافضل استخدام الخشب الزان مع التأكد من جفافه
بالنسبة للسفرة طالما هاتشتريها فى شهر 7 يبقى اصبرى للبوستات القادة هانشرح المواضيع دى بالتفصيل ان شاء الله
والسلام عليكم ورحمة الله وبركاته

راجى يقول...

الله الله الله ايه الحلاوة دى يا باشمهندسة
ياسلام بقى لو تكتبى المواصفات وبنود مقايسات تصلح للتنفيذ
بس التك !!! موش شايفه انه يبقى صعب الحصول عليه فى مصر وانه حيكون غالى نار خصوصا لوكان تيك بورما، انا اخر خشب تيك شفته فى مصر مصنوع منه بنش معمل الكيمياء فى مدرسة العباسية الثانوية منذ زمن سحيق
بس والله مدونة زى القمر
عاوزين نتواصل ومع الباشمهندس انشاء الله

صباح الخير يا مصر يقول...

باب النجار
*************
اولا اشكرك على الزياره
ومبروك على المدونه دى و ربنا معاكم وان انشاء الله نتعاون مع بعض ...ساحاول ارسال بعض انواع الخشب اللى شفتها اثناء رحلة عمل بالجابون التى تشتهر بثرواتها الطبيعيه من الاخشاب واللى لاحظت ان جنسيات كتير مهتمه بالحصول على هذه الاخشاب
تحياتى لك و للباشمهندس

Nour eldin يقول...

طبعا انا فعلا مبسوط
لانى دخلت مدونة متخصصة وفعلا مفيدة جدا
وارجو ان تكون دائما بكل خير
.......ز
نور الدين محمود

باحث عن الحق والحرية يقول...

مبروك علي المدونة
هتقل عليكم وعندي اكتر من سوال
بالنسبة للخشب الابواب والشبابيك عندنا خشب موسكي فلندي" ريمل تاجين علشان النجار مايزعلشي" بالنشبة لتشطيبه اريد مقارنة بين مميزات وعبوب وطبعا تكلفة انواع دهانات الاخشاب مثل اللاكية المغسول بالسيليتون وسحب سكنة فرنساوي و الدهان علي لونه والبلاستيك واللاكيه العادي وما الذي يناسب اكثر الواجهات وتاثير عوامل الجو وابواب الحمامات والمطابخ
السوال الثاني بالنسبة لبرامق السلم والتراسات ما مواصفات الخشب المناسب من حيث الخامة والمقايس وهل هناك ضرر من استخدام الغراء في حالة الغربة في زيادة قطر البرمق في التراسات وما طريقة التشطيب والدهان المناسبة
سوال تالت بعيدا عن الخشب بالنسبة للمحارة عادة ما يستخدم الصنايعي هنا الجبس علي مون المحارة وهو مايسبب مشاكل بعد ذلك "طقطقة وتنميل" ولذلك افضل عدم استخدام الجبس مارايكم؟ وايضا بالسبة للكرانيش"الطي" وربما الاسقف الجبيسة افكر في استخدام مونة "محارة" اسمنت مع رمل فقط ثم دهانها
وشكرا

samah يقول...

هل يفضل استخدام الخشب الاهوجنى للمطابخ

samah يقول...

هل يفضل استخدام الخشب الاهوجنى للمطابخ

سبهللة يقول...

الاخت samah
وليه لأ؟؟
اى خشب ممكن يستخدم لكن اهم حاجة انه يدهن كويس وانه يتعزل كويس عشان المية

غير معرف يقول...

سبهللة ليه ما ردتيش علي باحث ده سال علي اسئلة كويسة وانا كمان محتاجها ولا ده تجيز ضد الرجالة
يلا يا باحث تقريبا مش بتفق مع كتباتك رغم انها مميزة بالنسبة لواحد اسلامي زيك بس اهو الضرورة تحكم

غير معرف يقول...

هاى المدونه دى حلوه اوى وفيها معلومات كتير مفيده وياريت لو فى معلومات اكتر عن الابواب والشبابيك واسعارهم من كل نوع خشب ...ربنا يوفقكم
م\ايمى

مُرمم آثار يقول...

بالنسبة للخشب العزيزي كمان هو منتشر في الاثار الاسلامية بشده وفيه نوع من الخشب اسمه البيتش باين هو مشابه للعزيزي جدا لكنه مش عزيزي ونقدر نفرق ده بمدي مسامية الخشب لان الخشب العزيزي بيكون مشبع بالراتنجات والشموع الطبيعية اما البيتش باين فبيكون مش كده بالاضافة لكدة العزيزي اتقل ولو قشطت العزيزي او قطعته بالمنشار تلاقي ليه ريحة عطرية مميزة الغريب في كده انها منفرة للحشرات وكمان مقاومه للاصابات الفطرية والبكتيرية بصراحه يا جماعه هو خشب اكتر من رائع

سبهللة يقول...

مرمم اثار
اشكرك على المعلومات القيمة دى
وهى فعلا معلومات صحيحة

Nighto يقول...

ألف شكر على المعلومات القيمة حقيقى وربنا معاكم ومعانا
لى طلب وأرجو التلبية سريعا
كنت فقط أريد معرفة أماكن بيع خشب الموجنه والسيكامور فى القاهرة واسعار التكعيبه ان امكن حتى لا أصدم عند وصولى للتاجر ولكى تكون زيارة واحدة ويكون أفضل ان كان لديكم قطعتين بالمقاس الآتى
قطعة 12 × 80 ×5 سيكامور
قطعة 50 × 70 × 5 ماهوجنى
شكرا

نجار على باب الله يقول...

ومتل ما بحكي المتل باب النجار مخلع ههههههههههههههههههههههههههههههي كهكهكهكهكهكهكهكهكهكهكهكهكهكهكهكه
خخخخخخخخخخخخخخخخخخخخخخخخخخخخخخخي

غير معرف يقول...

انا غرفه نومى هتتغطى بالقشره بس مش عارفه نوعهاوانا اخترت اللون الوسط بس مش عارفه هتطلع حلوه ولا لاء ومحتاره ياريت تجبلنا صور غرف نوم مغطاه بالفقشره لو سمحت

omhazem يقول...

ممكن اعرف نوع مزيل الدهان لحجرة النوم الدوكو وايه طريقته
هو ده حاجة غير القشط
وجزاكم الله خيرا

غير معرف يقول...

اولا ميرسى جدا على تعبك ونصايحك ,ثانيا انا مخطوبة وحد قالى على مفكو حلوان وكنت عايزة اعرف اذا كان خشبة كويس ومكان مضمون ولا لاه لانى كنت فاكرة انى هاشترى على طول لكن قالوا لى انى اختار وبعد20 -30يوم استلم كنت عايزة اعرف ممكن يكونوا بيعرضوا حاجه ويعملوا حاجة تانية خشبها مش كويس,ارجو الرد بسرعة لانى مسافرة الاسبوع الجاى

Mahdy يقول...

السلام عليكم ورحمة الله وبركاته
لو سمحت يا بشمهندسين
كان ليا سؤال مهم وضروري جدا جدا
عندي كراسي سفره بس مدهونه دوكو بس خشبها كويس جدا
عايز اعملها لسفره جديده بس اسيب الكراسي
بس ازاي اقدر اشيل دهان الدوكو القديم لاني بعد كدا مش هدهنها دوكو
حضرتك كنتي قايله ف رد من الردود انه
بال paint remover
طب الانواع ايه والطريقه ازاي بالخطوات
وهل الريموفر بس كفايه ولا المفروض اعمل ايه تاني؟؟؟؟؟
ياريت رد حضرتك ضروري جدا جدا
وشكرا مقدما

من فضلكم يقول...

ممكن تتكلم أو تشرح الخشب المصنع , مهم جدااااااااااا من فضلكم

Engels4u يقول...

الله يعطيكم العافية شيء جميل وروعة
انا عندي سؤال ما هي استخدامات الخشب السويدي الأبيض ةالأحمر سواء بالبناء او الديكور والأثاث؟
وماهي اسمائه المعروفة والمحلية في مصر؟
لو تمكنت ان ترسل لي الشرح على
ameen_otaiby@hotmail.com
بكون شاكر لك جدا

غير معرف يقول...

ممكن لو سمحتى معلومات عن قشرة الكافور

غير معرف يقول...

ممكن لو سمحتي اعرف ايه الماده اللي بيتأكسد بيها الصالون المدهب في تشطيب الدهان

noha fouad يقول...

من فضلك لو انا عايزة اقدم شكوى ف محل اثاث ف دمياط ممكن تقوليلي ازاي دا لو عندك فكرة لاني اتعرضت للنصب من احد تجار الاثاث ف دمياط

noha fouad يقول...

من فضلك لو انا عايزة اقدم شكوى ف محل اثاث ف دمياط ممكن تقوليلي ازاي دا لو عندك فكرة لاني اتعرضت للنصب من احد تجار الاثاث ف دمياط

Nora Nano يقول...

انا لسه طالبه فى اولى تصميم داخلى واثاث و انا بشكرك جدا على معلومات دى لانى فعلا كنت محتاجتها جدا
ممكن اسائل سؤال هى اى انواع الرخام و اشكاله بتبقى عامله ازاى

فرسان النيل 0537772829 يقول...

شركة نقل اثاث بالدمام
عزيز العميل إن شركتنا من الشركات المتميزة التي لها خبرة كبيرة في مجال نقل الأثاث حيث تمتلك الشركة أفضل المعدات المستخدمة في عملية نقل الأثاث ، كما أن من المعروف أن عملية نقل الأثاث هي عملية ليست سهلة كما يعتقد الكثير من الأشخاص بل إنها عملية تحتاج إلى مجهود كبير وتحتاج إلى وقت طويل ولكن سيكون الأمر سهلاً إذا تعاملت مع شركة نقل اثاث بالدمام .
شركة نقل عفش بالدمام
- اليوم أصبح بإمكانك عزيزي العميل أن تنتقل للمكان المراد بكل سهولة وآمان مع شركة نقل عفش بالدمام .
- الشركة تعمل على توفير سيارات مجهزة لنقل المفروشات إلى أي مكان في المملكة .
- يتوفر لدي الشركة كل أنواع النقل .
- كما يمكن أن تطلب خدمة تخزين الأثاث من الشركة .
https://forsan-dmm.com/company-transfer-furniture-dammam/