الأحد، 18 مايو 2008

اول بوست... نقول بسم الله

السلام عليكم
زوجى وأنا مهندسين ديكور او بمعنى اكثر دقة (مصمم داخلى) دة الاسم الرسمى لمهنتنا
المهم اننا قررنا نعمل البلوج دة عشان نحاول نفيد اكبر عدد من الناس
واى حد عنده سؤال يخص الاخشاب خاصة او التصميمات الداخلية أو كل ما يتعلق بالديكورعامة يبعت لنا السؤال واحنا هنحاول نرد عليه
طيب احنا ايه اللى خلانا نفكر فى اننا نقول للناس معلومات عن الاخشاب؟؟
سببين
اول سبب : اننا كنا مرة ماشين فى الشارع ولقينا معرض اثاث عارض مطبخين من خشب الموسكى واحد لونه فاتح والتانى لونه غامق
ولما سألنا البائع عن سعر كل واحد فيهم قال ان الغامق اغلى بحوالى 2000 جنيه
- ليه ياسيدى ؟؟
- عشان الفاتح دة خشب موسكى والغامق دة خشب زان
طبعا انا وزوجى كتمنا ضحكنا لان البائع لو كان يعرف اننا بنفهم فى انواع الخشب ما كنش غشنا وطالما احنا اتعرضنا لهذا النوع من الغش إذن اكيد ناس كتير اتعرضوا له وهم يا عينى ما يعرفوش الفرق بين انواع الخشب
السبب التانى
لظروف مهنتنا فطبعا بنتعامل مع ناس كتير مهتمة بالاخشاب والديكور وخاصة العرايس والعرسان
واغلبهم هم واهلهم مش فاهمين اى حاجة كل اللى فاهمينه ان مافيش احلى من خشب دمياط
ولازم البنت تشترى عفشها كله من دمياط من المحل الفلانى دة اشهر واحد هناك عشان بنت خالتها اشترت منه وبنت عمها
اشترت منه
وطبعا هى مش اقل منهم دة غير انها لازم تشترى العفش فخم وضخم بصرف النظر عن مساحة المكان اللى هانحط فيه العفش دة
طبعا كل دة كلام فارغ
اولا عفش دمياط مش هو احلى عفش لان فيه كتيرمن الغش اللى ما حدش يتخليه
يعنى مثلا تروح تشترى غرفة البائع يقولك:
- لو جدع شيل ضلفة الدولاب دة خشب ماسيف يا بيه ( ماسيف يعنى خشب طببيعى )
وطبعا ماتقدرش تشيلها فتقول:
- يا سلام ادى الخشب ولا بلاش
ولما تتتفتح الضلفة دى من جوة هل ممكن تتخيل انها محشية رمل او صبة ؟؟ ( الصبة دى عبارة عن جبس بمية او نشارة بالغرا مع ورق وزبالة)
وطبعا المصيبة دى ممكن تعمل حشرات وفعلا والله العظيم واحدة صديقة لينا اصرت انها تشترى حجرة نومها من هناك من غير حتى ما تستشير اى حد بيفهم وطبعا لما الحجرة ركبت وابتدت صديقتى تستعملها وبعد تلات سنوات بالظبط من جوزاها واستخدامها للغرفة بدأت الزبالة اللى جوا الخشب تعمل حشرات والحشرات ابتدت تاكل الخشب وتخرج بره واصيبت صديقتى بالفزع وكلمتنى قالت لى الحقينى رحت انا وزوجى واخدنا الحجرة للورشة واول ما فتحنا الضلف فوجئنا بما يخرج منها من حشرات بسبب الصبة المكونة من قصاقيص الخشب والنشارة والورق .. وطبعا صديقتى من كتر قرفها من اللى شافته رمت الغرفة كلها واشترت غرفة تانية من شركة تصنيع أثاث معروفة وموثوق فيها

نوع تانى من انواع غش الخشب فى دمياط

تروح تشترى صالون زان .. يقولك البائع دة زان يابيه ميه ميه لما تتفرج عليها تلاقى ظهر الكنبة مثلا كذا لون وكذا قطعة خشب متوصلين ببعض عن طريق الغرا تقوله طيب ليه الكنبة مش كلها لون واحد ( دة طبعا لما تشوف الطقم قبل الدهان ) يقولك البائع : يا بيه دة خشب طيبعى دة زان بتاع ربنا مش ممكن يبقى كله لون واحد دة جاى من الشجرة على هنا على طول وكل قطعة حسب لون الشجرة اللى جت منها
وطبعا الكلام دة مش صح .. ليه؟؟
لان المفروض ان ظهر الكنبة مثلا عشان يكون صح بيتفصل من قطعه خشب واحدة
والطريقة دى طبعا هاتتسبب فى كمية كبيرة من هادر الخشب ودة طبعا مايعجبش التجار وبالتالى بيعملوه من قصاقيص الزان وبيغروها مع بعض لحد ما يتكون عندهم مايسمى بالطبلية ويبداوا يقصوا منها ظهر الكنبة فبالتالى بيكون ظهر الكنبة كذا لون لانه مش من قطعة خشب واحدة ومع الاستخدام الغرا بيفك ويبتدى ظهر الكنبة فى التشقق ويضعف وينهار مع الاستخدام
ولما الطريقة دى اتكشفت للناس فأصبح التجار حاليا بعد ما يعملوا الكنبة من قصاقيص الخشب اللى كل قطعة فيه لونها يختلف عن اللى جنبها .. يقوم صانع الكنبة بعد ما يصنعها يحرقها كلها اوكسجين عشان تبئى كلها لون واحد وبالتالى لما تشوفها تلاقى لون الزان فيها فاتح جدا يكاد يكون ابيض او اوف وايت فلما انت تشوفها كدة تقوله :
- ليه لون الخشب فاتح اوى كدة مش دة زان ولازم يكون فيه احمرار فى لونه؟؟ يقوم البائع يقولك:
- يا بيه دة زان نمرة واحد ودرجة اولى.. دة انضف نوع عشان كدة فاتح الغامق بيكون درجة تانية وتالته واحنا هنا بنستعمل الغالى بتاع التصدير ( مع ان مصر بتستورد الزان ) وبالتالى مافيش حاجة اسمها خشب تصدير لاننا مش بنزرع الخشب الزان فى مصر من اصله.
دى بعض المعلومات البسيطة عن انواع الغش فى الصناعه والبوست الجاى ان شاء الله هايكون عن انواع الخشب وبالتالى اللى عنده اى سؤال يحب يسأله احنا هنحاول نجاوب على قد معرفتنا ولو مانعرفش هانسأل ولو ما وصلناش لاجابة هانقول ما نعرفش عشان احنا اكتر حاجة بضايقنا لما نسأل واحد سؤال ويكون مش عارف الاجابة يقوم يفتى بالغلط ويغرق الى قدامه

نرحب بإستفساراتكم وربنا يقدرنا ونجاوب عليها ويارب تكون المدونة دى فى ميزان حسانتنا

هناك 63 تعليقًا:

جبهة التهييس الشعبية يقول...

مخلص امين
ح نشوف
:)
انا ح احطها على الريدر

باب النجار يقول...

يا دى الهنا يا ولاد
اول تعليق يكون من ام المدونين

tamer.sala7 يقول...

ربنا معاكم ويجعله في ميزان حسنتكم ويرزقك بالذرية الصالحة

royal rose يقول...

الف مبروك و يا رب تصلحو الباب و للا تشترولكو باب جديد احلي حاجه اسلوب الكتابه شيق و دمه خفيف
علي فكرة انا كنت عاوزه اقوللك اني عديت ع المدونه الصبح و احلي حاجهعجبتني هناك صور يودي حبيب قلبي شفتي انا سايبه المواضيع الجسم اللي انت كاتباها و طلعان عينك فيها و بعلق ع الصور الجميله اصل عجبني صور التخرج بعد الكفاح المرير علي يدي يااختي ههههههههههربنا يخليهو تشوفيه زي ما هو عاوز دكتور و للا ضابط؟

Bella يقول...

الله

حلوة قوي قوي المدونة دي

عرفتها من مدونة سبهللة ربنا يخليها لنا يارب

انا باحب الحاجات اليدوية جدا

يعني مش قصدي اني ح اعمل نجارة بايديا يعني

بس غاوية اعمل معجون للشبابيك مثلا او ادهنهم

حاجات مجانيني كده يعني

ومرة كنت بافكر اعمل دورة نجارة في مكان كان عاملها

وطبعا اخدت تريقة في البيت للركب لدرجة ان اخويا بقى ميمين الاسطى بيللا

الاسطى بيللا راحت

الاسطى بيللا جت

بس الحقيقة رغم حكاية الاسطى دي الا اني برضه لسه باحب الحاجات اليدوية

ونفسي اتعلم اعمل براويز خشب للتابلوهات الكانفاه اللى باعملها
فلو تكرمتم على ممكن تبقى حسب وقتكم يعني تعملوا دروس في عمل ابراويز ونجيب الخامات منين

وباقي الحاجات دي

بس بجد بقى مدونة جنان

تحفة

تسلم الايادي

تحياتي

باب النجار يقول...

بيلا
هاحاول اشرح لك موضوع البراويز فى بوسط لوحده بس بعد ما اخلص البوستات الخاصة بانواع الاخشاب
وانتى لو مستعجلة دى ميلى
raniarachad@yahoo.com
وممكن نتواصل عن طريقه وممكن اديلك رقمى نتلكم فى الموضوع دة براحتنا وفى اى استشارة تحتاجيها
معلش لازم نتواصل عن طريق الميل اولا لان صعب احط ارقامى على الملأ

Bella يقول...

ايه الهنا اللى انا فيه ده

ربنا يكرمك ياباشمهندسة ويرزقك الذرية الصالحة يارب

لا طبعا تحطي ارقامك على الملأ ليه

كفاية على الميل
ربنا يخليكي

وح انتظر لما تخلصي موضوع الاخشاب

اهو ح اتابعه معاكي وح يفيدين برضه اني اعرف انواع الخشب بالشكل مش بالاسماء بس

كمان كده كده مش ح افضى اليومين دول انفذ في موضوع البراويز

يعني ممكن لما تخلصي براحتك نبتدي بقى سلسلة البراوزي وبعدين كله ح ييجي في وقته

وشكرا على الميل

لما احب استفسر عن حاجة ح ابعت لك

ربنا يخليكي يارب

باب النجار يقول...

تحت امرك يا بيلا
دة النبى وصى على سابع جار
والمثل بيقول الجار اولى بالشفعة
وانتى جارتى فى المدونة اللى جنبى على طول

Baha'i Family - اسرة بهائية يقول...

مدونة جميلة،
من زماااااااان من ايام الكلية ما قرأتش عن الاخشاب والزان!!
رجعتونى لأيام زمان
:)

غير معرف يقول...

سلام عليكم

مدونة جميلة و مفيدة فعلا

ألف شكر

وليد

mora_227 يقول...

انا فتحت الباب بشويش اهه
و جاية اشكركم جدا المعلومات دى مفيدة جدا مش بس للشراء كمان للى مجانين اشغال يدوية زيى (اى حاجة تتعمل يالايد بتعلمها سباكة نجارة كهربا اشغال يدوية )
و ادعيلكم جزاكم الله كل خير و جعله فى ميزان حسناتكم
_ و يقعدهولكم فى عيالكم و هنيالك يا فاعل الخير و الثواب _
و حقفل الباب بالراحة كمان سلام عليكم

باب النجار يقول...

شكرا مورا
بس يا خسارة مالكيش مدونة كان عندى فضول اشوف مدونتك

mora_227 يقول...

اعملكم مدونة مفيش حاجة تغلا عليكم
بس ان شاء الله لما اجمع اللى حكتبه فيها و ابقى ساعتها استغل مدونتكم و اعمل لها اعلان كبير بالنيون فوق بابكم( بعد اذنكم طبعا ).

•√أريـ السمر ـج√• يقول...

جميلة جدا المدونة .. و توضيحك لطريقة الغش مفيدة جدا

جزاك الله كل خير

و بالتوفيق

غير معرف يقول...

السلام عليكم
احب ف الاول اقول ان الموضوعات اللي انتوا بتتكلموا فيها كويسة جدا و جزاكم الله خيرا على المعلومات القيمة دي
لكن اعيب عليكم انكم تقولوا على المنتجات الدمياطي انها مليانة غش
الغش موجود في كل مكان و ف كل مجال
و لو واحد من حضراتكم شاف الغش ده بعنيه ف ده مش سمة كل الدمايطة و الا ماكانوش نافسوا ف المعارض العالمية و انتاجهم لسه لحد دلوقتي بتصدر لكل دول العالم
انا بشتغل ف مصانع الموبيليات من سنه 2005 و المصانع اللي اشتغلت فيها كانت مصانع محترمة بمعنى الكلمة يمكن الموبليات عندهم غالية شوية لكن ده بيرجع لاتقانهم ف كل مرحلة و لأنهم بيستخدموا اعلى انواع الخامات
و لكم جزيل الشكر

و ياريت تتفضلي عندنا ف دمياط و تزوري المصانع و تتفرجي على المراحل كلها علشان تتأكدي ان لسه فيه ناس ف دمياط بتراعي ربنا و بتشتغل بضمير

سلام

dareen يقول...

سلام عليكم انا اسمي فاطمة من القاهرة فرحي قرب وبشتري الاثاث طبعا احترت كل بائع ليه كلمة ويحلف ميت يمين المهم انا اشتريت اوضة النوم من مفكو حلوان عشان سمعتها بس نفسي اعمل الصالون والركنة عمولة عشان التصميم الي نفسي فيه لكن البياع الخشب اللى عنده ابيض ومتقسم مش حتة واحدة لما سالته قاللي ده خشب زان ابيض قلتله لا عايزاه احمر قاللي اجيبلك بس تدفعلي الف جنيه زيادة وانصحك بلاش ده زي ده في المتانة خاصة انك هتغطيه كله وانا خايفة يكون بيغشني .. ممكن تساعدوني بخصوص الزان الابيض والاحمر وكمان بالنسبة لنوع التنجيد لو حد يعرف فيه هو عايزه كله اسفنج وفوق فايبر مش فاهمة انا طبعا حاجة

سبهللة يقول...

دارين او فاطمة
دة الميل بتاعى
raniarachad@yahoo.com
راسلينى عليه عشان اقدر اديكى رقم تليفونى وافهم منك تفاصيل اكتر واحاول افيدك
ومفكو حلوان طبعا مكان موثوق فيه واحسنتى الاختيار
وممكن نتقابل واروح معاكى اشوف الخشب

غير معرف يقول...

تحفه فنيه

تسلم ايديكى

والف شكر

على المعلومات القيمه

shams يقول...

والله معلوماتت هايله وانا الحمد لله انى لقيت اللى بدور عليه لانى كنت بدور على نوعيه خشب معينه التك بالتحديد عشان اعمل بيها تصميم وكنت عاوز معلوات اكتر عن اماكن الشراء واشياء اخرى واسف على الاطاله

أبوصلاح يقول...

يعني مش حرام عليك لما تضربي مثل سيئ وتعطي إنطباع لزوارك أن دمياط بلد غشاشة في الموبليا وبيحشوا الدلف زبالة ..!عيب كده وحرام عليك - مش كل دمياط كما ذكرتي ياهندسة .. إتقي الله

محمد بدراوى يقول...

السلام عليكم ورحمة الله أحب أشكرك جدااا يا باشمهندسة على المعلومات الجميلة دى لأنى تعبت من البحث على النت على موضوع الاخشاب لأنى بجهز شقة الزوجية وكنت محتار جداا فى اختيارى للأثاث هل أجيبه على الابيض ولا مدهون؟ وهل ممكن أتغش بردة لو جبت على الابيض ولا أجيب خشب خام وجيب نجار يصنع عندى فى البيت ؟ سؤال أخير معلش طولت عليكى أنا منبهر جداا بالخشب الارو أفضل الارو ولا الزان ولو غرفة أرو تعمل فى حدود كام تقريبا؟ وشكرا مرة تانية لطولة بالك على الناس الجهلة اللى زى حضرتى

باب النجار يقول...

الاخ محمد بدراوى
وعليكم السلام ورحمة الله وبركاته
فى شركة موثوق فيها اسمها مفكو حلوان خشبها كله زان وكونتر
واسعارها فى المعقول مقارنة بهابيتات مثلا مع ان هابيتات هايلة جدا بس اسعارها غالية شوية
وبالنسبةلانك تشترى خشب ابيض فكرة كويسة فى حالة انك تكون بتفهم فى الخشب لان ممكن بنتهى البساطة ممكن يتقالك ان دة خشب زان ويكون خشب جازارينا والكلام دة بيحصل فى المناصرة
والافضل من انك تتعامل مع نجار انك تتعامل مع مصنع ليه لان المصنع اولا ليه نظام ومواعيد تسليم ويخاف على سمعته وكل واحد هناك بيخاف من اللى اكبر منه وبالتالى الكل بيشتغل
لكن النجار والاستورجى وفئة الصنايعية هاتغلبك غلب كبير جدا ومش هاتقدر عليهم الا لو تعرف حد معرفة كويسة جدا
بالنسبة للخشب الارو مفيش احسن من كدة لكن سعره عالى

باب النجار يقول...

موبيلى مكتوب على المدونة
للى عايز اى استفسار

غير معرف يقول...

السلام عليكم ورحمة الله وبركاته
جزاكم الله خيرا على المدونه الجميله التى اعجبتنى شخصيا ولانى متخصص فى مجال الاخشاب اود بداية ان ابدى اعجابى بطريقة عرضكم لمواضيعكم وثانيا اتمنى ان يكون هناك تعاون مشترك ما بينا فانا اعمل نجار ديكورات وابواب وشبابيك حاصل على ليسانس حقوق ويشرفنى التعامل معكم
ده رقمى 0126569456
وده ايميلى amer_on_line@yahoo.com

مكرووونة يقول...
أزال المؤلف هذا التعليق.
سبهللة يقول...

مكرونة
انا ما عرفش المعرض دة
لكن لو شغلهم كله زان وكونتر يبقى كويس
المهم انك تكونى بتعرفى تفرقى بين نوعيا الخشب وغيرها عشان ما حدش يخمك
وبعدين فى شركة حلوة اسمها مفكو حلوان
كل شغلها ممتاز روحى معارضها وشوفى بنفسك
وربنا يوفقك ان شاء الله

غير معرف يقول...

لو سمحتوا انا كنت عايزةاستفسر عن حاجات كتير عن الخشب منها اسعاره دلوقتى و احسن الانواع اللى تستحمل الاستخدام المكثف و ايه انواع الخشب اللى يستحمل التعرض المباشر للشمس لفترات طويلة زى الخشب المستخدم فى اطقم الترابيزات و الكراسى اللى بتستخدم فى الأماكن المعرضة للشمس مباشرة زى الجناين
و احب اعرف وسائل الاتصال الهاتفى بيكو

GooD MaN يقول...

السلام عليكم ورحمه الله

مدونه جميله وهدفها اجمل تعقيبى بخصوص مسأله الغش فى دمياط واللى شايف ان حضراتكم عممتوا الصوره على موبيليا ..
دمياط

مش هنكر ان فيه غش لان ده شئ موجود فى الصناعات كلها وفى اى مكان .

لكن لما اقول لحضرتك ان اخر احصائيه فى روسيا اكدت ان 40% من الانتيك والاثاث الفاخر فى روسيا انتاج دمياطى

وان غالبيه مصانع ايطاليا وهولندا بتستورد الموبيبيا من دمياط بدون تشطيب ثم تقم بتشطيبها وبيها وعليها بادج صنع فى ايطاليا ..

بالعقل يابشمندس ازاى تشترى جهاز كامل ب 10 الاف جنيه " انتريه ونوم وسفره "

شوفت زبون جاى بالمبلغ ده وعايز يشترى عفشه كله !!!

الزبون ده لازم ياخد حاجه مغشوشه ونصيحتى للجميع لو الفلوس معاك على الاد انزل المنصوريه او اشترى من اقرب معرض لبيتك فى اى محافظه ومتسألش على الجوده و أتأكد ان الموبيليا دى من دمياط لكن مش بجوده دمياط المعروفه

انما لو عايز فعلا حاجه تعيش وخامه وذوق يبقى انزل دمياط ومتسألش عن سعر .

عجبنى مثال قريته فى البلوج على حساب سعر الخشب وفى المثال ان سعر الخشب فى الرجل = 6 جنيه طيب لو حسبنا ماكينه وصنعه نجار وصنعه ايمجى وصنعه استرجى ومنجد ده غير هامش ربح للتاجر رجل الكرسى دى سعرها يوصل لكام ؟

وبنفس القياس سعر طقم الانتريه ولا الصالون اللى فيه الرجل دى يبقى بكام ؟

mero يقول...

ياريت تساعدونى وتقولولى ايه الافضل للمطابخ الكونتر ولا السويد ولكم جزيل الشكر

باب النجار يقول...

ميرو
الكونتر حاجة والسويد حاجة تانية
الكونتر دة الواح خشبية
وطبعا هو هايل جدا لو هاتعملى المطبخ كله مسطحات سادة وهاتعتمدى على ألوان الدهانات .. يعنى اللعب هايكون بالاولن مش بأشكال الخشب

بالنشبة للسويد اللى هو الخشب الموسكى
هو مش وحش لو اختارتيه درجة اولى ومن غير عقد زى الخشب المستخ\م فى غرف السونا
ولو تم عزله كويس جدا ضد الماء اثناء عملية الدهانات هايبقى ممتاز ويعش ان شاء الله
http://www.tcedoors.com/gallery/
الموقع دة هتلاقى فوق فى اعلى الصفحة صور لضلف مطبخ خشبية
دى لازم تتعمل يا اما بالارو او الزان الو الخشب الموسكى اللى انتى بتقولى عليه سويد
ما ينفعش الخشب الكونتر فى شكل الضلف دى عشان فيها شغل

لكن الصورة دى
http://www.kilbrannan-ullapool.co.uk/images/PIC_0370.JPG
ينفع فيها الخشب الكونتر عشان الضلف سادة
يارب اكون قدرت افيدك

باب النجار يقول...

good man
كلامك صح
اللى معاه فلوس وبيفهم فى الخشب يشترى من دمياط
غير كدة صعب جدا انه ياخد حاجة محترمة ومش مغشوشة

Unknown يقول...

سلام الله عليكم ورحمته وبركاته

مدونة جميلة ما شاء الله
وحسيت انكم فعلا عايزين تساعدوا الناس
ربنا يجعلها فى يزان حسناتكم والمسلمين أجمعين اللهم آمين ...
أما بعد ،،
بصراحة انا شاب مقبل على الزواج
وهابتدى اجهز فى شقتى ان شاء الله
وانا كنت عايز انزل اشترى الخشب (زان ، كونتر ، ابلاكاش ) واودى الخشب لنجار يصممهم بالشكل اللى انا عايزة (كتالوجات او اوريله صور من على النت ).
وقبل ما انزل اشترى الخشب قلت اروح اسأل عند النجار كام هاتتكلف حجرة النوم او السفرة.... إلخ
المهم قالى حجرة النوم هاتتكلف 3000 جنيه(المصنعية بس يعنى ) والانتريه 900 جنيه بس انت اللى هاتجيب الفرش والدهان ..
والنيش 1500 جنيه
.......................
سؤالى هو :
عايز مكان فى الجيزة أو القاهرة (مصنع أو نجار ) يكون موثوق فيه وسعره بردو مش غالى ويطلعلى نفس الشغل اللى انا عايزة سواء كان الشغل اللى انا عايزة من صور على الكمبيوتر او من كتالوج...
وعايز اعرف الأسعار بالتفصيل..
جزاكم الله كل خير عنا..
وسلام الله عليكم ورحمته وبركاته

شيماء موسى يقول...

انا معجبه جدا بالموضوع
عندى سؤال ضررى الاجابه بسرعه الله يخليكى

انا عايزه اعمل غرفة الاولاد الوان بس الوان مط زى المستورد
ايه نوع الخشب المستخدم وكيفية الطلاء؟

علشان اقول للنجار وبينله انى فاهمه وأروبه
وهل السرير لما يكون برجول احسن ولا لما يكون بصندوق من تحت؟

واسمحيلى انا خدت ايميلك الشخصى أوكى؟

سبهللة يقول...

شيماء موسى
بصى يا ستى
نوع الخشب يفضل طبعا الخشب الكونتر
وطبعا افضل لك ان السراير تبقى معمولة سحارة عشان هاتحتاجيها فى التخزين
انا عندى كدة فى بيتى سراير ولادى كلها سحارة

moataz2007h يقول...

ارجو التواصل للاهمية 0177050204

غير معرف يقول...

انا نجار موبيليا وعندى ورشه شغال فيه بس داخل على جوز وعايز اشتغل فى شركه نجاره بس مش لاقى عشان عايز يبقى فى مرتب ثابت كل شهر والموهل بتاعى اعداديه تعرفوا شركه اشتغل فيه

غير معرف يقول...

سلام عليكم

مدونة جميلة و مفيدة فعلا
لوسمحتم انا اريدعمل في دمياط في معارض الموبلياممكن المساعدة
ebtsam_mohamed2002@yahoo.com

Aqel يقول...

السلام عليكم ورحمة الله

أسمي أبو يوسف ، من الاردن واقيم في السعودية
اشكر الباش مهندسة والباش مهندس على المعلومات القيمة والمبسطة والصور الجميلة.
لي مع الخشب قصة وهواية، بدأت منذ الصغر، فقد نشأت في شقة في عمارة حولها بعض النجارين، وكنت احضر نفايات الخشب واعمل بها اشياء جميلة وبأدوات بدائية.
اعشق الخشب، لونه، رائحته، صوت معاناته تحت النشر فلكل نوع انينه الخاص. لا تنسوا انه روح في الاصل. ويعطينا حنانه وحبه حياً وميتاً.
بعد عمل الكثير من الأشياء العابثة والالعاب للصغار ،كان اول مشروع خشبي هو تصميم وتنفيذ سراير للعائلة، وتسريحة لاخواتي الاثنتان باربعة إدراج، فبعد ان اتعبنا النوم على الارض، ولم المراتب كل صباح وفردها قبل النوم مساءً، استثمرت اول راتب في شراء بعض الواح اللاتيه بدون قشرة وصممتها بطريق تعشيق اثبتت انها ممتازة اذ لا تزال صامدة منذ عام 1990 رغم انتقالنا من منزل لآخر واستعمالها من قبل بعض الاوزان الثقيلة جداً. استغرب لماذا لم تتهالك حتى هذه اللحظة، وترفض والدتي – حفظها الله – التخلي عنها واستبدالها، وفي نفس الوقت. ومن المفارقات استغرب لماذا صممت ارجل السراير لتكون متحركة كي يسهل فكها وتركيبها عند النقل. وقمت بدهان سراير البنات باللون الزهري وسراير الاولاد اخواني باللون السكري .
اليوم اكملت دراساتي العليا، واعمل مستشاراً للقطاع العام، ولكن لم يتززع حبي للخشب، قبل اسابيع، ذهبنا مع بعض الاصدقاء لحفلة شواء، واحضر بعض الاصدقاء الذي يعمل في شركة مقاولات بعض الخشب للحرق واضرام النار، فانتخبت بعض الاخشاب الجميلة من المهاجوني والتيك والمرنتي وسحبتها منه وصنعت منها صندوقاً لابنتي الصغيرة مع تزينه بقشور الفستق الحلبي وقشور الجوز فهذه اخشاب طبيعية رائعة. فكان ابداعاً وسرت ابنتي كثيراً به.
اشجع الاخوان والاخوات على تبني هوايات وممارستها فهي واحة نهرب فيها من رتابة العمل ونحلق فيها في سماء حرة من الإبداع بدون ضغوط وتأتي نتائجها جميلة وباتقان عفوي.
لا اطيل عليكم والسلام
أبو يوسف

Mahmoud يقول...

ياريت حد يتكلم عن خشب الام دى اف بالتفصيل والقشر (الميلامين والفورميكا)

Mahmoud يقول...

ياريت حد يتكلم عن الخشب الMDF بالتفصيل والقشر بتاعته

غير معرف يقول...

ياريت تقولى هل فيه فى السوق المصرى أبلكاج زان سمك 5 ملليمتر واذا كان موجود اجيبم منين بالظبط

ياكوف يقول...

كنت عاوز اعرف خشب مفكو حلوان كويس و لا ايه ونوعه ايه بالظبط

ياكوف يقول...

كنت عاوز اعرف خشب مفكو حلوان كويس و لا ايه ونوعه ايه بالظبط

اخوكم من الاردن يقول...

السلام عليكم وشكرا على الموضوع القيم
اريد ان اعرف عند اختيار الاثاث والكنب كيف نعرف انواع الخشب ونميز الخشب المغشوش من غير المغشوش والمحشو والMDF والزان والاصلي ؟وكيف نميز تنجيد الكنب والاسفنج الاصلي من غيره اللي يهبط مع الاستخدام ؟ علما ان الاسعار مع الاسف لا تعكس جودة الصناعة وعدم غشها فهناك قطع اثاث من محلات مشهورة وباسعار غالية وتكتشف غشها
مع جزيل الشكر للباش مهندسة وزوجهاالباش مهندس

غير معرف يقول...

ممكن أعرف ايه أنواع الخشب المتوفرة في مصر لصناعة المراكب الشراعية وألواح التزلج علي الماءاللي يطلع عليه اسم )surf ( ولا اقصد الألواح الشراعية ..... اقصد ألواح التزلج علي الماء من غير شراع ...... لو تكرمت المهندسة تقولي ايه احسن نوع يطفو علي الماء والمتوفر عندنا في مصر وتكوني مشكورة لان بأمانة معلوماتك عن الخشب فعلن مفيدة والناس كلها بتغش في الخشب الأيام دي ..

Unknown يقول...

تسلم يا م. احمد
اسمحلي أقدم لكم هديه صغيره عباره عن معلومات فنيه منظمه بشكل سهل عن جميع انواع الأخشاب مثل الموسكي و البياض و الزان و الارو و البيتش باين و الموجنه... و كذلك جميع انواع المسطحات مثل الابلاكاش و الكونتر و الفاير بأنواعه على موقعنا WWW.WOODSHOP.COM.EG
أو متابعه صفحتنا على الفيس بوك
www.facebook.com/woodshopeg

Unknown يقول...

تسلم يا م. احمد
اسمحلي أقدم لكم هديه صغيره عباره عن معلومات فنيه منظمه بشكل سهل عن جميع انواع الأخشاب مثل الموسكي و البياض و الزان و الارو و البيتش باين و الموجنه... و كذلك جميع انواع المسطحات مثل الابلاكاش و الكونتر و الفاير بأنواعه على موقعنا WWW.WOODSHOP.COM.EG
أو متابعه صفحتنا على الفيس بوك
www.facebook.com/woodshopeg

غير معرف يقول...

السلام عليكم ورحمه الله وبركاته اشكركم علي تلك المعلومات القيمه والمفيده وكان عندي طلب ارجو الاهتمام به انا عندي كميه من خشب الحور الشجر فارجو ان تدليني علي من يستخدم تلك الانواع من الاخشاب حيث استخامه في مصر قليل جدا اشكركم علي سعه صدركم وشكرا ونرجو التواصل الاميل sokar2079@windowslive.com
رقم الموبيل 01226553030

Unknown يقول...

السلام عليكم
عندى سؤال : بعمل ركنة عمولة والنجار استخدم خشب كونتر هل دا صح ولا المفروض يستخدم خشب طبيعى زان مثلا ؟ وشكرا

غير معرف يقول...

السلام عليكم ورحمة الله وبركاتة
اخوكم ابو يحيى من الاسكندرية
وانا شغال استرجى موبليات
الرجاء الانضمام اليكم لانئ اعجبت بصفحتكم وانا عاوز استفيد منكم وانتم ايضا تستفيدون منى
واين مكانكم
ودة تلفونى 01275803319
الاسكندرية

Unknown يقول...

لو سمحتو حد يقولى مكان انزل اجيب منه صالون وما يتضحكش عليا ويكون محل وتاجر امين

Unknown يقول...

لو سمحتو حد يقولى مكان انزل اجيب منه صالون وما يتضحكش عليا ويكون محل وتاجر امين

حسين حمدى يقول...

السلام عليكم
انا عندي استفسار بسيط ويا ريت حد يفيدني فية هو الواحد يعرف نوع الخشب في الموبليا ازاي وهي مدهونة وهل ثقل قطعة الموبليا معناها انها كونتر واية الفرق بين الخشب الزان الابيض والاحمر
وشكرا

حسين حمدى يقول...

السلام عليكم
انا عندي استفسار بسيط ويا ريت حد يفيدني فية هو الواحد يعرف نوع الخشب في الموبليا ازاي وهي مدهونة وهل ثقل قطعة الموبليا معناها انها كونتر واية الفرق بين الخشب الزان الابيض والاحمر
وشكرا

Unknown يقول...

السلام عليكم
لو سمحت كنت حابة اسأل عن استورجي يدهنلي ابواب الشقة و الاوض لاكيه و بسعر معقول.. ياريت تردو على استفساري
شكراً

Unknown يقول...

ممكن اعرف لو عايزه اعمل مطبخ 12 متر مسطح لو عايزه اعمله اكريلك ممكن تفيدوني

Unknown يقول...


نقل اثاث بالمدينة المنورة
نحن شركة فرسان الخليج افضل شركة نقل اثاث بالمدينة المنورة و بها افضل العماله التي تعمل علي مساعدتكم في نقل عفش و نقل اثاث و بحرص شديد لكي لا يحدث مكروه بالاثاث و العفش و بأقل الاسعار التي لا تقبل المنافسه
شركة نقل عفش بالمدينة المنورة
اتصل بنا علي : 0553061333
http://www.forsan-elkhaleg.com/20/Moving-furniture-company-in-Madinah

Unknown يقول...

السلام عليكم انا من الامارات وعندنا محلات تجيب كنب دمياطي بس فيه فرق في اسعارها فيه رخيص وفيه غالي هل هناك فرق في الصناعه والمواد ام الفرق من التاجر انا حيران

سبهللة يقول...

لو حضرتك بتفهم في انواع الخشب وشايف ان النوع واحد عند التاجرين يبقى الفرق كدة في سعر كل واحد
انما لو نوع الخشب مختلف من تاجر لتاجر اكيد السعر كمان هايختلف

elmnzel يقول...


شركة نقل عفش بجدة
يمكنكم الآن التخلص من جميع الاعباء التى تسبب لكم الانزعاج الشديد فى كيفية نقل الاثاث الخاص بكم و كيفية نقل الاثاث و الحفاظ عليه و توصيله بكل حرص و حذر و لكن من الآن مع شركة نقل عفش بالطائف يمكنكم الأعتماد علينا فى نقل الاثاث الخاص بكم و ضمان ن قل العفش بكل حرص و التخلص من جميع الاعباء المزعجة تلك مع أفضل فريق من العمالة المدربة للعمل على أعلى مستوى فلدينا افضل الرافعات و الاوناش المستخدمة فى نقل العفش و افضل العربات المتخصصة فى نقل الاثاث الخاص بكم الآن ل ما عليكم هو التواصل مع افضل شركة نقل عفش بالطائف و نحن نأتى لكم فى الحال و اينما تريدون
نقل اثاث بجدة
http://elmnzel.com/moving-furniture-jeddah/

Unknown يقول...



شركة نقل عفش بالمدينة المنورة

ان كنت تحتاج لنقل الاثاث و العفش لمنزلك الجديد , فنحن نقدنم لك افضل شركة نقل عفش بالمدينة المنورة نقوم بنقل العفش و باساليب جديدة و مهارة و دقة كبيرة حتى لا يضر الاثاث و العفش مكروه اثناء عملية النقل
نقدم خدمة نقل اثاث بالمدينة المنورة بواسطة فرق عمل متخصصة في النقل
حيث تعمل على العى مستوى من الكفاءة و المهرة
يمكنكم الان التواصل معنا و الحصول على الخدمة فوراً

نقل اثاث بالمدينة المنورة

http://maliek.net/moving-furniture-medina/

Unknown يقول...

قدامي انترية عايز اشتريه والراجل قالي انه خشب زان ابيض ممكن اعرف نوعه كده كويس ولا ؟؟؟ وايه الفرق بينه وبين الزان الاحمر

Ahmed يقول...

سؤال لحضراتكم هل موبليات طنان خشبها كويس ولا برضوا اى كلام وكلها غش